seeking freedom

"There is only one good definition of God: the freedom that allows other freedoms to exist." John Fowles

Tuesday, May 23, 2006

عن أجوان النظام و رجل في قلب مصر

والهي لو جمال باشا سافر أمريكا يجدد الرخصة عشان ياخد الطيارة و يهرب بيها بره البلد ساعة الجد ففي ستين ألف...كتير من الصحف انتقدت التعتيم و السرية- اللي انفضحت في الآخر- المفروضة على الزيارة و كتير كمان أكد إن فضحها بالشكل ده معناه إن أمريكا مش موافقة على التوريث
جميل جدا. إنما بوش لما اتزنق آخر مرة و اضطر يتكلم بصراحة عن مصر أكد إن أمريكا هتدعم اختيار الشعب و هنا بقى نقف شوية
أكيد الإصلاحيين بيحققوا نجاحات و فيه حركة في الشارع إنما النظام برده للأسف بيسجل أجوان. في حلقة العاشرة مساء يوم الأحد دافع علي الدين هلال دفاعا مستميتا عن جمال مبارك و زيارته لأمريكا - في نص الحلقة اتصل واحد محترم جدا قال له: على فكرة أنا حضرت لك محاضرة قبل عشرين سنة و لو سمعت نفسك دلوقتي و إنت بتتكلم مش هتقدر حتى تقنع نفسك باللي إنت بتقوله
المهم اتكلم واحد من المواطنين اتمنى فعلا من كل قلبي إنه يكون من بتوع الحزب الوطني و مربطين إنه يتصل بيهم...الأخ المواطن اللي من السيدة و عنده 46 سنة كلف خاطره و اتصل مخصوص عشان يقول إن "احنا" المفروض نفخر إن فيه شاب في وسطينا زي جمال مبارك و إنه مايعرفوش و لا عمره قابله إنما شايف أد إيه هو شخصية محترمة و مفيش مانع إطلاقا يبقى رئيس جمهورية قادم. و في أوراق اعتماد السيد جمال كرئيس قادم بالنسبة للمواطن إياه إنه ابن رئيس بقى له خمسة وعشرين سنة في حكم البلد، ومش عارفة الحقيقة إذا كان ده المفروض يبقى في صالح جمال باشا و لا ضده. آه ده غير طبعا إنه ابن صاحب الضربة الجوية و برده مش فاهمة إيه علاقة ده بالرئاسة و لحد امتى هيفضلوا يذلونا بالحكاية دي
المشكلة إن فعلا في قطاع من الناس بيفكر بالشكل ده، ناس متعرفش عن الي حصل مع القضاة أساسا و لا اللي اعتقلوا و لا أي حاجة و مش عاوزين يوجعوا دماغهم. و فيه برده برامج تليفزيونية بتشكل -عفوا- بتشوه وعي الناس. من أسبوع و في أعقاب بيان الداخلية بتاع لموا نفسكم و اقعدوا في بيوتكم شفت بالصدفة حلقة من برنامج اسمه "روضة الإسلام" على القناة التانية المصرية و حبيت أعرف بيقولوا إيه للي مافيش عندهم دش عشان يتفرجوا على الجزيرة. كان من بين الكلام الي اتقال : تعجب الشيخ جمال قطب من المظاهرات باعتبارها عادة غربية و تساؤله عن مدى تأثيرها، و اقتراحه كوسيلة للاعتراض ما يعلمه لنا الإسلام في صلاة الجماعة - حسب ما قاله: عندما يخطئ الإمام و لا يرجع عن الخطأ فالمفروض أن يترك المصلي المعترض المسجد و يلزم بيته. وقال أن هذا هو مقابل ما نعرفه اليوم " بالعصيان المدني" حتى يزيد عدد المعترضين وذلك لأن المسجد يجب أن يسع الجميع. و كان فيه اقتراح كمان مقدم من رئيس الأمن بالتليفزيون - البرنامج كان مستضيف الاتنين في حالة تدعو للتأمل- بتدريس الأمن و المبادئ الديمقراطية مع بعض للتلاميذ في المدارس
ده طبعا غير الأضواء و الظهور الرسمي لخطيبة جمال مبارك و الحديث إنها "ستايل الملكة رانيا" -حسب ما جاء في المصري اليوم- و ده طبعا بيمثل مادة أخبار ومثار اهتمام لقطاع تاني من الشعب في إطار ثقافة الموضة و الدش و البوب كالتشر/الثقافة الشعبية اللي ماشية اليومين دول
و برده مش عايزين ننسى إن أيمن نور خلاص بقى عبرة لمن يعتبر بمعنى إنهم قضوا على فرصته في الترشح لأي انتخابات تشريعية أو رئاسية في المستقبل و بالمرة أي حد عايز ياخد نفس سكته. السيد نظيف بيطمنا إنهم ملتفتين أوي للإخوان و واخدين بالهم إنهم عايزين يتصرفوا ككتلة حزبية في مجلس الشعب بعد ما دخلوه مستقلين و إنهم مش هيسمحولهم أبدا...أساسا هما سابوا العدد ده كله يدخل المجلس على أساس إنهم مطمنين تماما لعدم إمكانية الإخوان النزول بمرشح في أي انتخابات رئاسية حسب التعديل الدستوري الأخير، لأنهم مش كيان شرعي
النظام بيشتغل على كذا جبهة و بسرعات مختلفة وواضح إن النية إن التوريث يمشي بنفس سيناريو "الانتخابات" السابقة، يعني الناس تقول كلمتها اللي مش هتختلف كتير عن كلمة النظام و رغبته، إما عن طريق عمليات غسيل المخ و التخلخل جوا الوعي أو عن طريق الأساليب التانية لو فضلت السلطة التنفيذية متدخلة في السلطة القضائية. و كمان أمريكا هتنبسط جدا بديمقراطية على المقاس من غير وجع الدماغ بتاع الإسلاميين. المشكلة في كمية الأجهزة اللي النظام قادر يوظفها في خدمته
هل ممكن نتفائل و نقول إن دي التحركات أو الانتفاضة الأخيرة لنظام أوشك على الموت؟
ليس يأسا ولكن بواقعية صادقة وتفاؤل لابد منه...مازالت المعركة في بدايتها
................................
على الهامش...لأ في الوسط، في المركز تماما تبرز صورة المستشار هشام البسطويسي على سريره في كاميرا العاشرة مساء مبتسما متفائلا قويا كما اعتدناه، برغم حبات العرق التي بدأت في التراكم على رقبته مع قرب نهاية الحديث، متأثرا من كم الحب الذي شعر به في محنته الأخيرة من قبل الناس.. متحدثا عن فقده للحياة لأربع دقائق و العودة مرة أخرى للمضي في الطريق

8 Comments:

  • At 5/23/2006 3:21 PM, Blogger TawTaw said…

    المكالمة بتاعت الأخ ده سواء كانت مأجورة أو غير مأجورة ليس لها أى أهمية بالسلب أو الإيجاب ، للأسف فى مصر مفيش مراكز محايده لأجراء أستطلاعات الرأى لكن فى تقديرى – وده تقدير غير علمى طبعا – أن شعبية مبارك بين 10 و 20 فى المئه ناهيك على شعبية الابن اللى هى أقل من أبوه طبعا.
    أنا معاكى طبعاً أن النظام عنده أدوات لا يستهان بها على رأسها الأعلام ، لكن مدى مصداقية الأعلام الحكومى وتأثيره على للناس أمر مشكوك فيه جدا.
    مش عارف قصدك ايه "بعدم إمكانية الإخوان النزول بمرشح في أي انتخابات رئاسية حسب التعديل الدستوري "، التعديل فيه أليه من الناحية النظرية لترشح مستقلين والأخوان عندهم فعلا العدد الكافى فى مجلس الشعب مش فاضل غير الشورى والمحليات.

     
  • At 5/23/2006 6:29 PM, Blogger salah said…

    برضه..عايزه تقولي ايه؟

     
  • At 5/24/2006 12:30 PM, Blogger arabesque said…

    tawtaw
    بالنسبة للإخوان فأنا فصدي إنهم ما يقدروش يرشحوا حد ككتلة بشروط ال 5% المخففة نسبيا عن شروط ترشيح المستقلين لأنهم مش كيان شرعي و الحكومة مش هاتخليهم حزب
    هما طبعا عندهم إمكانية الترشيح كمستقلين بس زي ما إنت قلت عددهم لسه مش كافي في الشورى و المحليات

    أنا معاك إن أكيد شعبية مبارك في النازل بعد كل الكوارث اللي حصلت من ساعة الفترة الجديدة وكمان ابنه...وعشان كده ظهرت توقعات توريث الحكم قريب لأن الحكاية مش هتمشي إلا في حياة الوالد و بمباركته. إنما عمليات غسيل المخ الإعلامية هي اللي قلقاني فعلا، و خلي بالك إن بالنسبة لنا في وسائل تانية للمعرفة إنما لحد ماعندوش دش و لا انترنت القصة مختلفة. المشكلة كمان إن لنا فعلا تاريخ طويل في كراهية الإعلام الرسمي و عدم تصديقه و التنكيت ع الحكم زي ما احنا عايزين، إنما ساعة الجد اللي بيروح ينتخب -أنا بتكلم عن الإجراءات السلمية العادية - عدد قليل و الباقي بيتفرج بس

    animal!
    هما كذا حاجة في بعض
    إنما المهم خوفي إن ساعة الاختيار الحرجة الجاية نلاقي جموع "المواطنين" تخرج تؤيد ابن مبارك زي ما خرجوا في "الانتخابات" اللي فاتت و نفأجا إن المعارضة لسه ماوصلتش للقاعدة

     
  • At 5/30/2006 9:13 AM, Blogger little sesame said…

    you have an analysing eye
    go ahead

     
  • At 7/22/2006 5:39 PM, Anonymous Anonymous said…

    This comment has been removed by a blog administrator.

     
  • At 2/06/2007 9:46 AM, Anonymous Anonymous said…

  • At 3/05/2007 12:13 AM, Anonymous Anonymous said…

  • At 4/25/2007 7:39 PM, Anonymous Anonymous said…

    Where did you find it? Interesting read » »

     

Post a Comment

<< Home