seeking freedom

"There is only one good definition of God: the freedom that allows other freedoms to exist." John Fowles

Friday, June 09, 2006

عن حفلة المدونين- أو بعضهم- الأولى


قبل تلات أيام من الحفلة ابتدت الموازين تختل. فجأة و بدون مقدمات اكتشفوا في البيت إن اللي باعمله ده خطر و البيت اتكهرب بصورة غريبة، خاصة مع قراري بعدم التراجع و إصراري إني ماباعملش حاجة غلط...النتيجة قطيعة مؤقتة مع بابا و توتر و ضغط باينين عليا في كل مكان
................

يوم الحفلة كنت موجودة في النقابة من بدري. شفت يحيى و أيوب و عرفت إن طبع السي ديهات ماكملش و عايزين نصور الورق اللي هانوزعه في الحفلة، غير متابعة بروفات فقرات الحفلة،و اللي قام بها يحيى على أكمل وجه
الساعة أربعة أكلم بابا على الموبايل و أصر إنه يحضر. يكلمني أخويا و يقول لي احنا كمان جايين...ماما و إخواتي
من أربعة لتمانية حركة وتوتر و أدرينالين طالع نازل لما ورمنا...إنما النتيجة كانت مدهشة
يحيى يحكي لي عن تدوينة إبليس "قول لأمك يا يحيى"ا
زينب –بنت مصرية- توصل و تحكي لي عن اعتراضات بعض المدونين
الساعة تمانية قلبي واقع في رجليا من قلة الحضور، و بعدين هنعمل إيه؟
عارفة إن فيه كلام كتير اتقال عن الحفلة من معترضين عليها، و مش فاهمة ليه الحقيقة
اللي اعترض على إنها باسم "المدونين المصريين" مش "مدونين مصريين" رغم إن دي كانت صفة اعتبارية للأننا كلنا مدونين و عاملينها في الأصل عشان المدونين –زي ما بنت مصرية وضحت- إنما محدش فينا طلع قال إن الحفلة دي مشارك فيها كل المدونين
واللي اتكلم عن التمويل و تسائل هو محمد عبد القدوس مضى الورق بتاع تأجير القاعة باسم مين، في تلميح إن الحفلة ممولة من كفاية أو حد من رموزها رغم تأكيدنا إن التمويل ذاتي أكتر من مرة. و بعدين الموضوع كان أبسط من كده بكتير و كان فيه حسن نوايا من كل الأطراف، و باحب أطمن السادة المتشككين إن ماكانش فيه ورق أساسا بينا و بين محمد عبد القدوس عشان يتمضي،و كان اتفاق شفوي تضامنا مع المعتقلين و كنشاط لجنة الحريات تتشرف إنها تتبناه. أنا فاكرة كويس بنت مصرية و هي بتسألنا في البداية عن الموضوع ده ا"طيب لو كلمة الشرف –بتاعة محمد عبد القدوس- دي باظت هنعمل إيه؟"ا
و كان الرد "هنعملها في الشارع و يبقى إعلام حقيقي"ا
و اللي اتهم اللي عاملينها بالترويج لأنفسهم...كلام صغير أوي ما يصحش يتقال و لا يترد عليه غير بنجاح الحفلة نفسها وزي ما يحيى قال إن محدش فينا طلع على المسرح ولا اتكلم. بالعكس أنا كم الناس اللي رعبتني من اللي عملناه خلاني منزوية أكتر محتمية بس بفكرة إننا على حق و بنعمل حاجة للفكرة الكبيرة اللي بتجمعنا كمدونين.. الحرية
................
بدأت الحفلة بأجزاء من فيلم الجزيرة...كل لما أدخل القاعة ألاحظ إن الناس واقفة رغم إن فيه أماكن فاضية، أتوتر و أخرج
أشوف واحدة مصرية و أسلم عليها و أسعد فعلا بمعرفتها
أدخل تاني و أحضر الجزء اللي سواق التاكسي بيشتكي فيه لوائل عباس من ضنك الحياة، و بيقوله "لو الراجل ده لسه مش عارف اللي بيحصل لازم يعرف"ا
تصفق الناس بشدة و أشترك معهم بحماس. الجزء ده بالذات من الفيلم باحسه أوي...الراجل ده أكيد من سنتين تلاتة كان هيخاف موت يطلع يقول الكلمتين دول. إنما اللي مش عارفة النظام إنه كفّر الناس بمعنى الكلمة
ينتهي الفيلم بنشيد غريب و يقول لي بعدها أخويا "إيه النشيد ده؟ كان عامل زي أغاني الإخوان المسلمين"ا
أضحك و امّن على كلامه
شوية و الأمور تنتظم مع ظهور فرقة "حالة"، و هما اسم على مسمى، و ألاحظ بسعادة إن الناس دلوقتي واقفين لأن ببساطة مفيش مكان فاضي يقعدوا فيه
طلعوا على المسرح ببيجامات كستور و شعر منكوش و ابتدى العرض المجانيني المفتكس. عرض حالة بالذات حسسني قد إيه الحفلة دي حفلة مدونين...التدوين نفسه فكرة جديدة افتراضية أكبر ما يميزها الإبداع و الأفكار الجديدة و الخروج عن كل مألوف سواء في الاتجاهات أو الاعتقادات
وقفت ورا مع زينب في الضلمة نتفرج و نشجع و نصقف و نضحك و شوية و هنطلع نرقص معاهم. أفتكر أساتذة الجامعة اللي دعوتهم وأميل على زيزي:هو كله مجانيني كده و لا إيه.. عايزين شوية عقل
يحيى يعدي علينا و يلاحظ حالة النشوة و يسأل: همممممم مبسوطين؟
نضحك و نقول : أيوة/ جدا
الناس منفعلة جدا مع "حالة" عاجبهم الشكل و المضمون الجديد...شباب موهوب و بيعبر عن نفسه أخيرا و المفاجأة إن التعبير مبدع جدا و بيعبر عن كل الناس. احنا مش جيل مفصول عن تاريخ بلدنا وواقعه و لا حاجة بالعكس احنا عايزين فرصتنا و بس ...و ده حقنا
أخرج و أتحدث مع فريق العاشرة مساء...يسألون عن مدى تضامن النقابة: فيه بيان هيدعموكم فيه يعني؟
وأجيب : لأ مفيش تضامنهم معنا في تبرعهم بالقاعة و بس لو بتدور على بيان مش هتلاقي
يقلقهم ما يحدث بالداخل و يصدرون القلق و التوتر لي أضعاف مضاعفة..."كده مش نقد بس" ، "كده انتوا اتعديتوا الخطوط الحمرا" ، ا"كلكم هاتتشدوا" ، "انتي ايه جبرك على الكلام ده" و كلام كتير
أتضايق من التعليق الأخير، عارفة دولة الخوف اللي ابتدت تتكون جوانا و عارفة إن الأمن مالوش منطق و إن مادام اشتركت في حدث زي ده لازم أتحمل المسئولية كاملة و أتوقع الاستدعاء و الشد و كل ده، إنما جوايا دايما فصل بين كل الحاجات دي و بين إني مابعملش حاجة غلط و من حقي أقول اللي أنا عايزاه
أرد" الرد الوحيد المنطقي على كل ما يحدث الآن إن الناس تلبس مجانين و تطلع تقول اللي هي عايزاه"ا
أتذكر قلق بابا و أفكر ترى بماذا يفكر الآن؟ و أرفض أي لقاءات تلفزيونية
أدخل القاعة مرة تانية و أنقل لزيزي كلام فريق العاشرة مساء
أراقب في الظلام ردود فعل بابا و أفرح لما يصقف بانفعال
ينتهي عرض "حالة" بأغنية شهيرة في حب مصر "وهأفضل أحبك أحبك أحبك"، بعد كل ده و بعد كل اللي جننونا و كفرّونا هنفضل نحبك برده
يقف الناس و يبدءون في المغادرة. أسلم على د.ليلى سويف و تبلغني إعجابها بالحفل. وأذهب لأعطي السي دي لأحد أساتذة الجامعة الناشطين و أقابل بابا هناك : "همممم إيه رأيك؟"ا
يرد : "هايل جدا طبعا"
أنا بسعادة: "بجد!!!"ا
هذه اللحظة من أهم لحظات الانتصار الشخصي و الارتياح اللي شعرت بها اليوم ده...أشعر بخفة مفاجئة وأتعجب متسائلة عن مصدرها؟
آآآآه افتكرت.. أطنان القلق من الأمن اللي اتصدرت لي من فريق العاشرة تختفي في لحظة...ببساطة يولعوا أتذكر كلام علاء في إحدى رسائله من السجن عن أهمية دعم الأهل أو فهمهم على الأقل و أتذكر مناقشة مماثلة بيني و بين يحيى
.........................
يصعد الأستاذ أحمد سيف والد علاء ليقرأ رسالة من علاء و الشرقاوي و أخرى من كريم الشاعر على المسرح
ثم العزف على الفلوت
و فرقة جميزة
غادة –صاحبة مدونة سامحوني ماكنش قصدي- تمتلك صوت بديع. كذلك نورا مطربة الفرقة و الأداء الشعري للشاب بتاع قصيدة "كراسي تيفال ما بتلزقش" أكتر من هايل...و طبعا عزف و ألحان عمر مصطفى جميل جدا
استمتعنا جدا بفقرة جميزة، إنما ماينفعش أتكلم عن جميزة من غير ما أتكلم عن سوء التفاهم اللي حصل يوم الأربعاء و التسييح ع المدونات
ببساطة كان من البداية مقرر إن عمر يمسك الإعداد الفني للحفلة ككل و احنا علينا الباقي. و في اجتماع أون لاين ماحضروش يحيى لظروف معينة أعلن عمر إنه مش هيقدر يمسك الإعداد الفني كله إنما موجود معانا بفرقته. المشكلة كمان إن كان فيه كلام عن غياب بعض أعضاء الفرقة
النتيجة إن يحيى استلم الإعداد الفني للحفلة و سقط منه بشكل ما إن عمر لسه معانا بفرقته. أما حكاية إلقاء شعر رامي يحيى فمعنديش عنها تفاصيل كافية
وده اللي سبب المشاكل و الدربكة يوم الأربعاء. بعد فقرة عمر هنيته و فرقته على أدائهم المتميز فعلا و اعتذرت له عن اللبس اللي حصل و وضحت له إن ده بسبب قلة الخبرة و إنها التجربة الأولى لنا جميعا – ماعدا عمر طبعا لأنه متمرس
وضايقني جدا إنه في تدوينته عن الحفلة قال
إني ماحبش أشارك ولا أكون جزء من (نشاط منظم) لمدونين على الأرض ولا مقتنع بتعاونهم كمدونين إلا في بيئتهم الطبيعية الافتراضية
أولا :زي ما رد يحيى احنا مش ممثلين لكل المدونين و ماقلناش كده و مانقدرش نقول الكلام ده
ثانيا:قبل ما نبقى مدونين احنا بني آدمين عاديين جدا واتفاقنا إنك تقدم فقرة في الحفلة زي اتفاقك مع أي ناس تانية، كون إن فيه مشاكل حصلت ده فلا لقلة الخبرة التنظيمية مش أكتر. يبقى ليه تقول إن التجربة دي خلتك تقرر ما تشاركش في أي نشاط تاني "للمدونين" بالذات على الأرض . كمان مفيش داعي نوصم التجربة كلها بالفشل و ندي الانطباع ده لباقي الناس اللي محضرتش
ثالثا: نجاح الحفلة ككل بيقول إن تعاون المدونين ممكن يؤدي لنتائج هايلة على الأرض
رابعا: نزول المدونين على الأرض أو عدمه ماكانش الهدف الأول أو الجماعي للحفلة دي بأي شكل من الأشكال. الواقع الأرضي نفسه هم اللي فرض نفسه علينا لما لقينا إن مدونين مننا بيعتقلوا عشان بيدافعوا عن قيم أو آراء بيؤمنوا بها. و محدش يقول لي إنهم اعتقلوا أساسا عشان نزلوا الأرض و مافضلوش مدونين، لأن دي مش إدانة لهم. هما أحرار في مواقفهم الشخصية و نزولهم الأرض من عدمه و احنا كمان في اختيارنا إننا ندعمهم على الفضاء الافتراضي أو الأرض
خامسا: اقتراح مشاركتك الحفلة كان من بنت مصرية في البداية. الملحوظة دي الهدف الوحيد منها إني أقول إن مشاركة عمر كان مرحب بها من أكتر من فرد من المجموعة المنظمة مش قرار فوقي أو رجاء شخصي مني
انتهى
.......................
فرقة "ضي" كانت هايلة بشهادة الجميع. للأسف ما حضرتش العرض كله لأني كنت بره وجوا في الوقت ده بالذات. إنما في النهاية قعدت على كرسي بعيد و ابتديت أسمع

حرم عليا العادلي أخرج في مظاهرة
حرم عليا العادلي أخرج في الصالة
حرم عليا العادلي أخرج من الدولاب
حرم عليا العادلي أطلّع نفسي

والأروع إنها على الموسيقى الأثرية "حرم عليا بابا ماروحش السيما". كمان الإلقاء الشعري الرائع

اطلع ع الشاشة
اطلع ع الشاشة واتمعظم
اطلع ببشاشة ومهندم....ا
اوصف حالي
لو غير الحال...يصبح حالي
ما نت طول عمرك يا أفندم عارف مالي
فاهم في الوجع العمالي
لكن مصر دي بقى غيرها سميها الصين أومالي
القدرة لو تبقى إدارة
الزير ينفع يبقى وزير
ومعــــونة ماعون... واللت كتير
بس ديمقراطي مش هي ديمقراطـك
وبلادنا لو تبقى مراتك
اعقد شرعي.......
ليه بس الأحكام العرفي
وبلادنا لو تبقى مراتك .....
ما تجوزشي لولدك من بعدك...
يطلع ع الشاشة ويتمعظم.. يوصف حالي
عارف مالي ؟؟
يخلص مالي
ولا جبتش أشياء لازمالي
و تصفيق حااااااااد. شكرا لأمجد القهوجي على نص القصيدة الأصلي
أجمل ما في الفقرات إنها جديدة و إبداع الشباب ذاتهم من غير إتكال على تراث نجم و إمام أو أي حد تاني. و من أجمل اللي سمعته اليوم ده كان قبل الحفلة بفترة. كنت داخلة النقابة و قابلت د..إيمان يحيى من جامعة قناة السويس على سلم النقابة. سلمت عليه و فكرته بالحفلة و دعوتي له. لقيته فاكرني و قالي كلام مهم و جميل جدا
قالي إن جيلنا هايل بجد و إنهم ماكانوش فاهمننا كويس. و قد إيه هو منبهر إننا واعيين لقضايا الحريات من سننا الصغير ده، القضايا اللي هم اخدوا بالهم منها بعد ما كبروا
قال لي: انتوا جيلكم أنضج من جيلنا بكتير
........................
بعد اليوم ما انتهى في العربية، بابا يسألني: هو فيه تجمع للمدونين المصريين؟ ليه مايبقاش فيه رابطة لهم؟
أرد :لأ...المدونين فيهم كل ألوان الطيف و اختلافهم كبير في حاجات كتير، فيهم الإخوان و المتخلفين و الإسلاميين اللي بيفهموا و اللادينيين و............. ده حتى فيه ناس معترضة على حفلتنا دي و ما ينفعش تجميعهم بالشكل ده
......................
نلتقي بالليل ع الماسينجر و كلنا مبسوطين
أهم حاجة باخرج بها من التجارب دي العلاقات الإنسانية.. من أول "علّي صوتك" لحد الحفلة
علاقتي بزيزي توطدت أكتر...ومن مشروع لمشروع يا أستاذة
يحيى و أيوب و شيماء...الحقيقة مفيش كلام في دماغي- :) وده العادي زي ما بقيتوا عارفين
إنما فيه مشاعر كتير ليكم مزدحمة جوايا
وشعور غريب بفورة وانفجار يعقبه فراغ رهيب بعد الحفلة ما خلصت
و امتنان بلا حدود للمناسبة اللي جمعتني بكم

20 Comments:

  • At 6/09/2006 9:05 PM, Blogger أحمد said…

    مبروك .. مبروك... مبروك
    و عقبال البكارى انشاء الله

     
  • At 6/09/2006 10:13 PM, Anonymous Anonymous said…

    انا حضرت الحفلة و عايزة اقولك انها كانت من أحلى اللحظات اللى عدت عليا...كنت بجد بضحك من قلبى...و ساعات أموت عايزة أعطيت على اللى بيحصل ف مصر...بس بجد مكنتش متوقعة النجاح الساحق ده...بجد كان تحفة, و جزاكم الله خيرا بجد بجد!!!!كان تحفة

     
  • At 6/10/2006 3:53 AM, Anonymous يحي said…

    :D

     
  • At 6/10/2006 6:12 AM, Blogger Bahz Baih said…

    كان نفسى اروح الحفله...بس ماقدرتش .بس ما علينا المهم فى ناس بتقول كانت وحشه و ناس بتقول كانت حلوه
    انا شايف انها تجربه مفيده بغيدا غن أى حاجه تانيه احنا كلنا بنجرب
    بنجرب تمرد على الحكومه العادات النظام الكتابه و الاهل احيانا
    بس الف مبروك

     
  • At 6/10/2006 11:30 AM, Blogger عمرو عزت said…

    بس الواحد كان نفسه يقابل " وجها لوجه " اكبر عدد من المدونين

    كان المفروض نقول لكل مدون يحط ورقة علي صدره مكتوب فيها اسم مدونته علشان نعرف بعض

    ملحوقة
    النهاردة فيه حلقة نقاش عن التدوين في مركز الدراسات الاشتراكية
    7 ش مراد - بالقرب من ميدان الجيزة - أمام جاد

    ما تنسوش الورقة

     
  • At 6/10/2006 11:34 AM, Blogger عمرو عزت said…

    الساعة 7

     
  • At 6/10/2006 10:29 PM, Blogger Yasser said…

    المهم عشان مارغيش كتير برضو
    في المصانع الاوروبية زاد تمن الايد العاملة ففكرو انهم ينقلو مصانعهم لدول تانية تمن الايد العاملة فيها اقل والدول كان منها باكستان والهند ودول شرق اسيا وطبعا مصر
    ازاي؟ بانهم يبعتو للحكومات فلوس يطورو المكن ويدربو الايد العاملة عشان تكون بمستوى الشغل الاوروبي
    الناس في البلاد اللي برة اخدت الفلوس وطورو بيها المكن بتاعهم ودربو العاملين واخر تمام
    في بلدنا العزيز بقى
    المسؤلين الحلوين اخدو الفلوس راحت فين؟ طبعا احنا اعرفين ان جزء من الفلوس ياعيني دخل جيوبهم من غير مايقصدو دة مش موضوعنا دلوقتي لكن باقي الفلوس اتدرب بيه عمال؟لا طيب اتطور بيه مكن؟ برضو لا امال راح فين؟؟؟
    اتعمل بيه ندوات وحفلات واحتفاليات بمناسبة الطفرة القادمة في مجال الصناعة في مصر واللي واضح انها مش ناوية تيجي ابدا
    طيب انا بقول دة ليه وايه علاقته ببهية وهي بتغني؟
    يعني بالذمة ايه الفرق بين دول وبين دول
    يعني بدل مانعمل حاجة مفيدة بالفلوس دي نعمل بيها مشروع صغير مثلا ممكن انه يشيل بطالة 3 شباب من شبابنا المحتاسين على القهاوي لا رايحين نعمل حفلة ونشتري سيديهات ونوزع السيديهات على الناس اللي هما عارفين اصلا بالمشاكل اللي في البلد يعني حتى على الاقل ماجابوش في الحفلة حد نعرفه باللي بيحصل لا دول جابو بعض وجابو من يعرف بجميع جوانب القضية
    طيب ايه الفايدة انا عاوز واحد يقول لي فايدة واحدة بس اي حاجة اي نوع من اي حاجة -طبعا سيبكو من الصحافة لانهم جايين يعملو شغل لجرايدهم مش عشان القضية ولا يحزنون
    من الاخر اللي حصل دة هباءا منثورا

     
  • At 6/11/2006 4:21 AM, Blogger arabesque said…

    أحمد
    أهو ده اللي واخدينه منك

    anonymous
    كان نفسي تقولي اسمك:) إنما مش مهم المهم إنك انبسطي و الرسالة وصلت

    يحيى
    أيوة كده محدش واخد منها حاجة

    bahz baih
    الله يبارك فيك...كان نفسي تحضر وتحكم بنفسك إنما أكيد هي فعلا تجربة جديدة و اتعلمنا منها حاجات كتير

    عمرو عزت
    :) ورقة على صدره
    عموما اتلحقت في حلقة النقاش و سعيدة فعلا بالتعرف عليكم
    الدنيا صغيرة عموما:)

    yasser
    يعني هو أنا الحقيقة بافضل دايما أرد بهدوء على الأفكار المضادة الغريبة و بحب كمان استنى شوية عشان ماحطش أول رد فعل على المدونة، إنما المرة دي مش قادرة
    أولا فلوس إيه اللي نشغل بها تلات شباب عاطلين؟؟؟التمويل ذاتي واحنا أحرار في فلوسنا
    ثانيا إنت ازاي تشبهنا بالحكومة كده بدم بارد؟ بقى اللي سجن و حبس و تحرش زي اللي بيغني وبيتضامن مع المعتقلين و يلم تبرعات؟؟؟؟؟؟؟؟؟؟؟؟
    الهدف الأول من الحفلة كان لم التبرعات، والناس تبرعت فعلا
    لو التبرعات مش زي ما كنا عايزين ده مش ذنبنا و الا كمان هنروح نخرج الفلوس من جيوبهم
    احنا حاولنا نعمل اللي علينا و اللي في مقدرتنا و فعلا نجحنا
    غير كده بقى مايجيش واحد قاعد في بيتهم براحته و جاي ينظّر على حسابي و يقول لي "هباء منثورا"ا
    أما عن التعريف بالمدونين فبرده احنا عملنا اللي علينا عشان نعلن عن الحفلة و نجيب ناس مالهاش علاقة بالتدوين عشان تعرف عن الموضوع
    وده حصل عشان تبقى عارف
    إنما قبل برده ما تيجي تقول الفمين المحترمين دول
    المفروض كنت حطيت في حسابك عددنا كان محدود أد إيه و الوقت قصير ازاي و مع ذلك كنا بنتحرك في كل اتجاه

    حاجة غريبة فعلا

     
  • At 6/11/2006 11:14 AM, Blogger Omar said…

    مريم/ شكراً جزيلاً على شهادتك بخصوص اللي حصل معايا، وانك فكّرتي يحيى إني مجتش باقتراح شخصي أو تزكية منك، وإن وجودي كان باقتراح من بنت مصرية وبترحيب من باقي الناس، وإني ملزقتش لحد ولا رميت جتتي ولا جيت اقولكو والنبي عايز العب معاكو

    شكراً كمان إنك قلتي إني أعلنت عن اللي هاقدر اعمله بالظبط قدام الجميع، وإن السيد يحيى تصوّر من نفسه لسبب ما إني مش موجود أنا والناس بتاعتي، لدرجة إنه اتهمني أنا إني نزلت ع الحفلة ببراشوط!! حفلة ايه دي اللي هانزل عليها ببراشوط، ده طبعاً كان شيء مينفعش أرد عليه لإني كان لازم اغلط والعملية متستاهلش اصلاً

    وده رغم إني قابلتكم واتفقت معاكم ولم أعتذر لأي منكم، ومكانش مطلوب مني أي اتصال ولا تأكيد على أي حد لإني مش مسئول عن تصورات الآخرين ولخبطتهم الشخصية في التنظيم

    وبعدين يا مريم أنا مسيّحتش لحد في حتة، وكل كلامي مكانش فيه أي سيرة عن أي فشل، بالعكس، وراجعي كلامي كويس، كل اللي انا قلته إن الحفلة معجبتنيش شخصياً لأسباب فضلت عدم ذكر معظمها، رغم إنها كانت مفيدة وليها صوت، وإني مش مقتنع دلوقتي بجدوى عمل المدونين على الأرض، ودي نظرية انتي مش محتاجة تثبتيلي عكسها، لإنه رأي شخصي ومجرد ولا يحمل إدانة لأي كان، وإن كنت أنا لم أعجب بأشياء في الحفلة فكتير غيري أعجبوا بيها وكتبوا ده، فمش انا اللي هدّي انطباع لكل اللي محضروش انها كانت سيئة أو فاشلة، أرجوكي اقري كلامي كويس، لإني ميرضنيش زعلك أبداً، وشكراً على الإطراء يا ستي

     
  • At 6/11/2006 5:42 PM, Blogger Romantic Rose said…

    ألف ألف مبروك النجاح الجميل للحفله يا مريم .. بجد مجهودكم مشكوووووووور جدا .. و كان نفسي اكون معاكم قوي .. بس تتعوض ان شاء الله ..
    :))

     
  • At 6/12/2006 1:48 AM, Blogger arabesque said…

    عمر
    أنا عارفة إن فيه ناس كتير اتكلمت وعلقت على الحفلة بس تعليقك كان الأول تقريبا اللي انكتب أو قريته
    في الآخر هو رأيك و انت فعلا حر فيه
    إنما أنا مش زعلانة و حصل خير

    romantic rose
    أمولة
    يا سلام لما الواحد يسمع الكلام ده من حد بيقدره
    الله يبارك فيكي..أنا اللي كان نفسي تكوني موجودة، كنتي هاتنبسطي جدا إنما هاتتلحق إن شاء الله

     
  • At 6/14/2006 11:33 PM, Blogger Yasser said…

    طبعا انا بعتذر اني تسببت في نرفزتك
    بس احب ارد على بعض النقط
    انا قصدت التشبيه بالحكومة شان تققولي كدة بالظبطوتبدأي بالمقارنة
    بالنسبة للفلوس اللي تشغل شباب انا ميستعد اخلي ليك شاب يبدأ تجارته بنفسه ب50 جنيه بس لاني الحمد لله عملتها قبل كدة لكن اهم حاجة هو الشاب نفسه عاوز لا لا
    تالت حاجة
    فلوي تبرعات
    للمعتقلين؟ اللي قاعدين في المعتقل؟ ازاي؟
    اعذريني لو كنت غبيا في السؤال االخير ولكن لا اعرف فعلا ازاي واريد فعلا ان افهم
    وشكرا لعدم مسحك لردى

     
  • At 6/15/2006 1:38 PM, Blogger arabesque said…

    أولا اعتذارك مقبول و حصل خير

    التبرعات للمعتقلين بتاخدها لجنة الإعاشة عشان يشتروا للمعتقلين أكل و أدوية و أي حاجة يحتاجوها
    مثلا في واحدة من رسالات علاء اللي اتنشرت فهمت إنهم بيطلبوا بيروسول عشان يعرفوا يقعدوا في الزنزانة من غير صراصير

    أما بالنسبة للمقارتة مع الحكومة فأنا لسه بأرفضها
    مش ممكن تشبه نهب منظم لفلوس من حق الشعب بناس بتستخدم فلوسها عشان يمولوا حاجة هم مؤمنين بها

     
  • At 6/16/2006 2:00 AM, Blogger littilemo said…

    بقين فى الجون

     
  • At 6/18/2006 2:21 AM, Anonymous القهوجي said…

    سلامو عليكم ... أنا أمجد القهوجي شاعر الفريق : ضي و الحمد لله بعد الحفلة دي أعلنت انضمامي للمدونين مع سبق الإصرار والترصد
    وما تعتذرش يا عم ع الذاكرة التعبانة ززز نص القصيدة أهوه

    اطلع ع الشاشة


    اطلع ع الشاشة واتمعظم

    اطلع ببشاشة ومهندم

    ..... اوصف حالي

    لو غير الحال... يصبح حالي

    ما نت طول عمرك يا أفندم عارف مالي

    فاهم في الوجع العمالي

    لكن مصر دي بقى غيرها سميها الصين أومالي

    القدرة لو تبقى إدارة....

    الزير ينفع يبقى وزير

    ومعــــونة ماعون... واللت كتير

    بس ديمقراطي مش هي ديمقراطـك

    وبلادنا لو تبقى مراتك

    اعقد شرعي...

    .... ليه بس الأحكام العرفي

    وبلادنا لو تبقى مراتك .....

    ما تجوزشي لولدك من بعدك...

    يطلع ع الشاشة ويتمعظم.. يوصف حالي

    عارف مالي ؟؟

    يخلص مالي

    ولا جبتش أشياء لا زمالي

     
  • At 6/18/2006 4:12 AM, Blogger arabesque said…

    شكرا يا أمجد على نص القصيدة:)و مبروك المدونة الجديدة

     
  • At 6/19/2006 12:31 PM, Blogger أبو أمل said…

    مبروك
    لكل الشباب المدون
    رغم فرحتى
    فأنا حزين لأنى مكنقاعد فى الحفلة
    بس تابعت شوية ع الجزيرة مباشر
    فعلاً مبروك لينا كلنا
    بس نفس أالأشعار اللى اتقالت بشكل مفصل

     
  • At 8/07/2006 3:47 PM, Blogger اتقى الله said…

    رائع جدا التحدث بمنتهى الجرأة
    و الاجر أ هى روح المدونينن المصريين المغامرين
    اتمنى يكون فيه العديد من الحفلات فى كل محافظات مصر لاقامة مثل هذه الامسيات مرة اخرى

     
  • At 8/08/2006 4:00 PM, Anonymous Anonymous said…

    This comment has been removed by a blog administrator.

     
  • At 4/23/2007 8:37 PM, Anonymous Anonymous said…

    Wonderful and informative web site. I used information from that site its great. »

     

Post a Comment

<< Home