تعليق

نشرت البي بي سي على صفحتها الإلكترونية امبارح إن الحزب الوطني فاز بأغلبية مريحة 72%في انتخابات مجلس الشعب. استغربت الخبر و التدليس اللي فيه

النهاردة المانشيت الرئيسي في"المصري اليوم" بيقول : "النتائج النهائية للانتخابات: 73% للوطني بمستقليه و 20% للإخوان....إلخ" وتحته مانشيت تاني أصغر "33.5 % نسبة نجاح الحزب الحاكم بعد إخفاق 287 مرشحا خلال المراحل الثلاث". المشكلة إن المانشيت الكبير -بحجمه و لونه الأسود- هو ما لفت نظري في البداية والمانشيت التاني شفته بعد قراءة الخبر أساسا

رأيي إن المفروض الصحافة المستقلة في مصر تبعد عن كتابة نسبة 73% نهائيا و تفصل أكتر، يعني تقول 33.5% وبعدين ضموا مستقلينهم اللي نسبتهم 40%... إلخ، لأن ده رفض للأمر الواقع اللي بيحاول الحزب الوطني يفرضه وهيساعد على استمرار حالة الوعي النسبية الموجودة بين الناس . ده غير إن ده يحد من استخدام وسائل الإعلام العالمية لمصطلح "الأغلبية" كده في المطلق . الكلام ده مش تحصيل حاصل. اللغة و الإعلام بيأثروا في وعي الناس ولازم يبقى فيه مقاومة للتصريحات من عينة تصريح صفوت الشريف لجريدة" الجمهورية": "خضنا الانتخابات بأبنائنا المستقلين لتفتيت الأصوات"...........نقلا عن "المصري اليوم"ا