"الإسلام هو الحل"

تمسك الإخوان المسلمون بشعار "الإسلام هو الحل" من بداية حملة الانتخابات البرلمانية- مع "إصلاح الدنيا بالدين"على لافتات الدعاية الانتخابية- برغم المشاكل اللي أثارها الشعار واعتراض بعض الأحزاب من أعضاء الجبهة الوطنية للمعارضة عليه-خاصة حزب التجمع الاعتراض الأساسي ضد الشعار إنه بيوحي باحتكار الإخوان للإسلام وكأن برامج الأحزاب التانية ليست من الإسلام في شئ. كمان إذا كان الشعار الهدف منه فقط توضيح المرجعية الأيديولوجية للجماعة-بحسن نية- فالشعار مش موضح أي إسلام بالضبط لأن الدين حمال أوجه وفيه من المذاهب و التفسيرات والقراءات والآراء المختلفة في كل أمر، دا غير إن اللعب بالدين خطر جدا في بلد زي مصر
طيب...كل دا مش جديد. شخصيا و عملا بمبدأ حسن النية ولأن نفسي المعارضة تعمل حاجة بجد ولأن الإخوان قوة سياسية متواجدة في الشارع-بس مش قوة جامدة أوي كده زي ما بيحاولوا يوهمونا بدليل" الانتخابات" الرئاسية اللي فاتت- اعتبرت الشعار مطاط من غير برنامج سياسي واضح ملزم للجماعة وخلاص. شعار مستفز وغير موفق...بس ماشي
الجديد بقى تصريحات محمد مهدي عاكف المرشد العام للجماعة في المصري اليوم النهاردة الأحد 6نوفمبر 2005في الصفحة الأولى. قال: " نحب أن نقول إن الوطني لا يحتمل منافسة الإخوان، وعلى الرغم من أننا لا نريد أن نصطدم به، فإننا قادرون على إسقاط الوطني في الانتخابات،شريطة أن تكون انتخابات نزيهة وشفافة. وأضاف: نحن نريد أن نبلغ رسالة هذا الدين إلى الشعب المصري ولن يستطيع أحد أن يحول بيننا وبين ذلك، وإذا ما حاول أحد ذلك فلن نتركه، مؤكدا أن دخول الإخوان مجلس الشعب من أجل مصلحة الشعب ورفعة دين الإسلام". ا
أنا حطيت كل الجزء دا عشان محدش يتهمني إني خرجت الكلام من سياقه. ومش هتكلم كتير عن حكاية إنهم مش عايزين يصطدموا بالحزب الوطني، إنما اللي صدمني بجد حكاية إبلاغ الرسالة للشعب المصري دي!!! الكلام ده يدخل –في رأيي- في إطار الغباء السياسي بجدارة ومعناه الوحيد إن الشعب المصري كله على بعضه كده عنده خلل في فهم الرسالة الصحيحة للإسلام اللي الإخوان لما يمسكوا الحكم هيوصلوها لنا. محاولات جماعة الإخوان لتغيير خطابهم ورسم صورة مختلفة عن الصورة العنيفة المترسبة في الأذهان –واللي منها محاولات جابت نتيجة فعلا خصوصا مع وجود شخصيات حظيت بقبول و تعاطف من الناس زي د.عصام العريان- واعتبارها قوة معارضة محترمة خسرت كتير بالتصريحات دي. بس المشكلة مش مشكلة تصريحات، المشكلة دلوقتي في الفكر اللي ورا التصريحات و اللي اتضح إنه ماتغيرش زي ما كنا فاكرين ولا حاجة لأ ده كان بس بيحاول يجمل نفسه لزوم السياسة يعني