seeking freedom

"There is only one good definition of God: the freedom that allows other freedoms to exist." John Fowles

Thursday, August 04, 2005

وقاحة

عتدما أعلن أن الحد الأقصى للانفاق على الحملة الانتخابية لأي مرشح هو عشرة ملايين جنيه اتعجبت أوي...قلت لنفسي و هو مين من المصريين الشرفاء عنده مبلغ زي ده عشان يدخل يصرفه في الدعاية الانتخابية و كنت ساعتها بفكر في أساتذة الجامعة و المثقفين ، و طبعا فهمت ان الرقم ده بالذات معمول عشان هيناسب جدا امكانيات الحزب الوطني و زبانيته و كل اللي عايز يصيبه من الحب جانب
بس دلوقتي شايفة الموضوع من زاوية تانية...اخر مرة قرأت جرايد كان عدد المترشحين و صل 44 و كل واحد في دول هياخد نص مليون جنيه قال دعم من الدولة، يعني يعملوا 22 مليون جنيه لحد دلوقتي. ضيف عليهم 30 ألف ملطوش لكل قاضي هيقبل يشرف على الانتخابات دي، ضيف عليهم كمان بقيت العشرة مليون بتوع حملة الريس لأنك لو دورت هتلاقيهم فلوس ناس غلابة برده
شوف بقى كل المبلغ ده مدفوع بس عشان حتة لعبة.. تمثيلية.. ديكور الحزب الحاكم عايز يعملها و منعرفش عايز يقنع بيها مين بالضبط. الدول الغربية؟ لأ هما عارفين أحسن من كده و عندهم اعلام و مخابرات يجيبولهم دبة النملة مش أحوال شعب مرئية رأي العين-للي عايز يشوف .
الناس؟ اللي هو احنا يعني؟ أكيد لأ مش الحزب الوطني اللي يعمل كده و عمرهم ماهيعرفوا يداروا على بلاويهم و الناس مش عارفة حتى تاكل لأن كل ماياكلوا حاجة تجيلهم نزلة معوية أو تسمم-دول الناس اللي معاهم فلوس يجيبوا أكل أساسا
أمال مين؟ مين اداهم الحق في انهم يصرفوا و يبعزقوا كده من قوتنا على لعبة مزيفة سموها انتخابات عشان مزاجهم يلعبوا
و ييجوا بعد كده بكل بجاحة يقولولك اننا دولة فقيرة...وببجاحة أكبر يطلعوا أطفال مصر المرضى بالسرطان في اعلانات على القنوات السعودية و الخليجية يستجدوا المال و الحسنة عشان يتبني لهم مستشفى يتعالجوا فيها

10 Comments:

  • At 8/04/2005 9:44 AM, Blogger wa7d_masry said…

    على فكرة اللي هياخد النص مليون هم بتوع الاحزاب و المستقل اللي يجي 250توقيع يعني المستيدين بتوع الاحزاب
    اهم حاجة عند الحكام العرب انهم يفضلوا قاعدين على الكرسي ويورثوها لولادهم بعد ما يموتوا يارب
    على فكرة يا طاهر قول لزميك اللي باع البلد برحلتين وبكره يكون عنده ابن ويشوفه هو بيدور على وظيفة و مش عارف يتجوز يمكن يعيش لغاية ما يشوف قاعدة امريكية جنب الغيط بتعهم

     
  • At 8/04/2005 11:46 AM, Blogger Milad said…

    زي ما قال واحد مصري، مش كل واحد سحب ورق الترشيح يبقى مرشح، لكن كل واحد استوفى الشروط. في التهابة هيبقوا بالكتير 10 أو 15.
    الفلوس دي مش فلوس ضايعة، المفروض إنها على المدى البعيد تكون مفيدة لأنها هتسمح للأحزاب إنها تعبّر عن نفسها أمام الجمهور. أما عن ضخامة المبلغ فده مش حقيقي. حتى بالنسبة لميزانية دولة متواضعة زي مصر المبلغ ده مش كبير.
    ـ

     
  • At 8/04/2005 4:54 PM, Blogger Taher said…

    يا عم مصرى اهدى وصلى على النبى
    اولا نا مش بدافع عنه لانه بقوله انت كده مش ليك لازمة فى الدنيا بس خلينا اقولك حاجة
    فيه ناس كتير جدا جدا جدا ما يعرفوش عن كفاية
    المهم انا حرد عليك عندى واقولك حاجات حتعجبلها والله العظيم بس لان الموضوع حيطول خلينا نعلق هنا على الموضوع بتاع الانتخابات ده
    ياللى بتدورى على الحرية ( ابقى قابلينى ان لقيتيها فى عهد حسنى) المهم هو حسنى مش حيغلب
    هو حيحط 10 مليون جنيه دعايا انتخابية زى ما قصر برج العرب اتكلف سوره لواحدة 18 مليون جنيه وهو اللى قال كده بعظمة لسانه وقال ايه هديه
    مش حيغلب فى ال 10 مليم (بالنسبة له) مليون دول
    وثانيا هل انتى او انتم كلكم ان الموضوع حيبقى عشرة مليون بس
    امال فين الحبيبة بتوع الريس
    وبالروح بالدم نفديك يا مبارك
    والخير اللى حيتوزع
    واللى حيرشحه حياخد ورقة بماية
    وقماش الجلابية ببلاش
    والخير يعم لمدة شهر
    طبعا ده ولا يكفيه 30 او 40 مليون
    بس محبى الريس ( ها ها ها ) دا على اساس اننا عبط هم اللى حيمولو الحاجات دى بس على اساس انهم بحبو فى الريس على الرغم من ان الاوامر جايلهم من قصر العروبة
    الموضوع مش سهل
    بس الضحك على الناس مفيش اسهل منه
    انا مشيت فى انتخابات قبل كده وعارف ان الراجل البسيط ممكن تضحك عليه بكلمة كويسة
    الراجل الناصح بقرشين
    اما المحترم حيفضل محترم لو اديته كل ما تملك

     
  • At 8/05/2005 3:01 AM, Blogger arabesque said…

    جايز المبلغ مش كبير فعلا زي ما كنت متصورة انما اعتراضي في الاساس هو على المبدأ، على عبثية الصرف كده يمين وشمال و كمان العبثية في خلق جو مزيف المفترض به انه جو تغيير و ديمقراطية و هو ولا حاجة لعب على فاشوش

    أى لعبة لها طرفين انما الحكومة بتلعب مع نفسها على اعتبار ان احنا مصدقين ومبسوطين بالفرجة...أنا عارفة ان احنا اتهمشنا كتير أوي و انضحك علينا لدرجة ان الحكاية بقيت عادية بالنسبة لناس كتير و ما بتثيرش أي عجب بس لما تبصلها كويس تستغرب فعلا ازاي الناس دي قادرة تصدق نفسها للدرجة دي

     
  • At 8/05/2005 6:22 AM, Blogger Taher said…

    لان اللى كنا بنستغربله أصبح واقع
    فالناس بقيت تصدق

     
  • At 8/06/2005 8:11 AM, Blogger أنا said…

    بصه انا مليش دعوة بكل اللي انتوا بتكلموا فيه ده
    من الاخر كده السبوبة دية لو فيها لقمة طريه ...انا قاسم فيها
    لو مفهاش يبقي نستنه 2011
    واصبر علي جار السوء
    مش كده ولا ايه؟؟

     
  • At 8/09/2005 2:52 AM, Blogger Taher said…

    هى الناس كلها بطلت تكتب ولا ايه

     
  • At 8/09/2005 10:34 AM, Blogger arabesque said…

    معلش يا طاهر أصل اليومين دول يومين فرجة زي ما أنت عارف

     
  • At 8/10/2005 11:49 AM, Blogger sydalany-وش مكرمش said…

    على رأيك يا أرابيسك

    و اللي ما يشتري يتفرج

    و محدش معاه يشتري

     
  • At 3/06/2007 11:30 PM, Anonymous Anonymous said…

    Looking for information and found it at this great site... »

     

Post a Comment

<< Home