بعيدا عن السياسة

بعد إحباطات نفسية و سياسية كتيرة اليومين اللي فاتوا، رجعت تاني أشتاق للمدونة و الكتابة و "البوح". الكلمة دي عجبتني جدا لما سمعتها النهاردة من الأستاذ سيد محمود في إذاعة الشباب و الرياضة

نبتدي الحكاية من الأول...غادة صديقتي العزيزة جدا -عشرة الخمس سنين-وأول واحدة تعرفني على مجتمع المدونين كلمتني الأسبوع اللي فات عشان تقوللي إن إذاعة الشباب و الرياضة عايزة تعمل لقاء مع الشباب اللي بيكتب في "مصر مش كده" كمثال على المدونات عموما و فكرتها و أهميتها عند الشباب. أهم حاجة فكرت فيها إني أخيرا بعد أربع شهور من الحياة عبر العالم الافتراضي هاشوف الناس دي في العالم الحقيقي و أعرف كنت بتناقش وأختلف و أعلق وأتفق مع مين. كان نفسي العدد يبقى أكبر من كده، بس ظروف السفر والانتقال من محافظة للتانية- للأسف-خلت العدد قليل. بنت مصرية كمان كانت مشغولة للأسف. إنما قابلت حامد ونوران ودعاءوسمعت صوت أمل على التليفون

أول ما اتقابلنا كان الجو غريب ولسه مش عارفين بعض...شوية و طلعنا الأستديو اللي هانسجل فيه، حجرة خضرا محندقة إنما حميمية أوي، يادوب ساعت الكراسي بتاعتنا لما قعدنا حوالين مقدمي البرنامج. شوية و الكلام اتفتح و بالصدفة بنفس طريقة المدونات و التعليق عليها...يعني تتقال مقدمة و بعدين احنا نعلق

الكلام خدنا على فكرة التدوين عموما و أهميتها بالنسبة لنا كشباب، حامد شاف إن التدوين مهم لأن الناس اتخنقت و محدش بيسمعنا كشباب عشان كده المدونات لاقت رواج في مصر. دعاء قالت إن التدوين له دافعين، التعبير عن حالة خاصة أو التعبير عن الشأن العام خاصة إن مفيش فرصة للكلام ده في الإعلام. رأيي كان إن أهم حاجة في المدونات إن مالهاش سقف يعني مفيش رقابة عليك غير نفسك، وحتى لما بنعلق على بعض بنراعي ده وبنقبل بعض و نعلق بعقول مفتوحة. نوران قالت أن المدونين كمجتمع معظمه شباب بيتلاقي عشان نفكر مع بعض ونكتشف إننا فعلا بنعرف نفكر و نندمج في مجتمع شبهنا مانحش فيه بغربة. وغادة شافت إن احنا كشباب دورنا مغيب في الجامعة

و بيحكمه عامل الوقت وانشغالنا بالدراسة، و بالتالي فالمدونات المكان المناسب للمناقشات بيننا

الكلام خدنا لحاجات كتيرخاصة بالمدونات، دورها في قياس الرأي العام والربط بين الشباب. نوران نوهت عن كلام محمد حسنين هيكل عن مجتمع المدونين وبالأخص مدونة "بهية". حامد قال حاجة مهمة عن الفرق بين المدونات المصرية و المدونات في الغرب. قال إن المدونات الغربية بتاخد شكل اليوميات أو المذكرات، إنما في مصر المدونات مكان نتكلم فيه و يجمعنا مع بعض .دا اتفق مع رأيي إن المدونات مهمة في نفسها، ومهمة كمان كمرحلة بنتطور فيها و بنتقابل ونتجمع عشان نتناقش ونعدل على بعض لغاية ما نوصل لوقت صوتنا فيه يبقى أقوى وأعلى وأكثر قدرة على التغيير..قريّب إن شاء الله

شوية وجالنا تليفون من واحدة اسمها أمل. لما قالت" أمل" كان عادي، إنما أول ماقالت الاسم المستعار "رومانتيك روز" كلنا هيصنا و عليت همهمات التواصل. أمل اتكلمت عن سعادتها بإن الإذاعة بتسمعنا دلوقت وازاي كان نفسها تكون معانا لولا إنها من اسكندرية. الحقيقة دا فكرني ازاي إن المدونات بتلعب دور مهم في ربط شباب مصر في مختلف المحافظات لأن نظام الحكومة بتاعنا-اللي هو لا باين له مركزية من لامركزية- بيحسسنا دايما إن مصر دي هي القاهرة و الجيزة.. يعني و ممكن إسكندرية.عند أهلي في الصعيد مثلا رايح "مصر" معناها رايح " القاهرة". ا

الوقت كان جميل و خلق أمل جديد جوايا .. إحساسي بقدرة العالم الافتراضي على خلق روابط بين الناس علي جدا و عجبني تعليق المقدمين-لما أمل اتكلمت- عن وجود نفس نبرة الحماس في أصواتنا كلنا..وافتكرت كلام غاندي -بعد ولادة بنته الجميلة-عن إحساسه بإننا أفراد عيلة واحدة افتراضية