seeking freedom

"There is only one good definition of God: the freedom that allows other freedoms to exist." John Fowles

Friday, July 21, 2006

هنحارب...هنحارب"ا"

تنبيه: في المساحة الصغيرة القادمة سأمارس الكثير من الإحباط...إذا كنت من المتفائلين أو المتحسسين من اليأس اقفل الصفحة أحسن
كل اللي بيحصل في لبنان دلوقتي معناه واحد بالنسبة لي..لبنان بيدفع تمن تخاذل و ضعف العرب كلهم، وما بتكلمش هنا عن الحل العسكري
مش فاهمة دعوات الناس اللي عايزة فتح حدود و يروحوا يحاربوا هناك. طيب ما الجيش اللبناني موجود ؟ و حزب الله نفسه هناك كمان؟ انتوا هتعملوا إيه بقى؟ و عملتوا إيه هنا أساسا؟
الحرب دي كان ممكن تخلص في يومين لو كان فيه ضغط ورأي عام محترم و كان فيه حد بيعمل لنا حساب في العالم ده، لكن احنا صفر كبير جدا ع الشمال- شيء مش جديد يعني
بالنسبة لي الحرب مش حل . الحل العسكري مطلوب أحيانا لكن لازم جنبه حل سياسي لتعايش طويل الأمد. و الدبلوماسية بتكسب حلفاء أكتر لأن الحروب مكلفة بشريا و ماديا زي ما أي إدارة محترمة تعرف - ده طبعا لا ينطبق على إدارة غبية زي الأمريكية كده. عملنا احنا إيه بقى على صعيد الدبلوماسية؟ عملنا اللي قدّرنا عليه قدرنا الصفري الكبير طبعا
بيانات متخاذلة لا ترقى حتى لمستوى التعاطف الإنساني مش القومي و لا أي رابطة تانية...و طبعا كل شوية يصحوا الميتين اللي على الكرسي يقولوا كلمتين كده نفهم منهم إن الدولة تبذل أقصى جهودها لوقف إطلاق النار، و قناة النيل للأخبار تطنطن شوية و تعيد وتزيد و كان الله بالسر عليم
طيب يا إخواننا يا للي فوق الناس لسه هناك بتنضرب و تموت كل يوم، أمال جهود إيه اللي انتوا بتعملوها؟؟ ما حدش بيرد كالعادة...أصل النظام فوق إرسال بس إنما الاستقبال بايظ شوية
.......................
طيب جميل جدا ده على المستوى الرسمي
الناس بقى و الشعوب العربية و كده يعني....آه قلنا دول الرجالة اللي عايزين يروحوا يحاربوا و يموتوا هناك ...شهادة ببلاش بقى
طيب ما إنت لو عملت نص اللي عليك هنا هتبقى بتجاهد كمان و تساعد إخواتك اللي هناك بشكل أحسن. لو حكوماتنا دي بتخاف مننا و عارفة إننا هنحاسبها في يوم من الأيام كانت وقفت وقفة محترمة وضغطت. جايز شكلنا إننا صفر كبير في معادلات القوى في المنطقة، إنما أكيد فيه بدايل و سياسة و لعب من تحت الترابيزة و حاجات كتير تقدر حكوماتنا تضغط بيها. بس يعملوا كده ليه؟
خيالهم المريض بيقول إنهم كده في أمان و حكماء و عقلاء أوي -اسم الله عليهم-و الضرب بعيد عنهم. و الناس ساكتة يبقى يتحركوا ليه؟
كان فيه مظاهرة يوم السبت للإفراج عن النعتقلين السياسيين و كان فيه هتاف مع لبنان و فلسطين، و كمان قدام دار الحكمة يوم الأحد لكن كام واحد بقى كان في المظاهرة؟؟ أنا كنت في الأولى و شفت بنفسي
النهاردة الأعداد أكبر في الأزهر... لأن واضح إن الإخوان اتحركوا و رافعين مصاحف في المظاهرات، و كمان مكان التظاهر نفسه و توقيته، بعد صلاة الجمعة و الناس لسه خارجة من الصلاة و بتقول لها الجهاد هناك يبقى ما تتظاهرش معاك ليه
الناس بتتحرك بالعاطفة الدينية - هبّات على رأي إبراهيم عيسى- أهو بتفضي و خلاص. لكن لما إنت مش حر عايز إزاي تحرر غيرك؟
أفضل وقفات أو مظاهرات شفتها كانت الوقفات الصامتة للمطالبة بحق اللي ماتوا حرقا في مسرح بني سويف.أحيانا كتير الصمت بيبقى أبلغ من الكلام. وقفوا صامتين و في إيديهم لافتات بتشرح الموقف و المطالب و كل حاجة...المنظر كان بيلفت النظرو الناس بتقرب تقرا عشان تعرف. أحيانا الهتافات العالية بتخوف الناس و بتبعدها عن المظاهرة ما بيجوش يقفوا معاك، بيكتفوا بالفرجة من بعيد أو بيبعدوا بسرعة عن الضابط و يعملوا مش شايفينك أو يقولوا ينصر دينك في سرهم و يمشوا برده
لسنين طويلة جدا لعب القهر و الخوف دورهم جوا الناس، ده غير سياسة الطناش الحكومي و بالتالي اتبنى شعور بعدم القيمة و عدم جدوى أي شيء. بتزعق؟ زعق براحتك ...ده شعار المرحلة -على الأقل لغاية قبل قانون الصحافة الجديد- و النظام معطل الاستقبال. الناس لازم تحس الأول إن وقفتها لها أهمية و إنها ممكن تعمل فرق على الأقل على المستوى الإنساني، على مستوى الكرامة الفردية قبل أي حاجة تانية
كان نفسي أشوف وقفات صامتة تطالب بإنهاء العدوان على لبنان، ناس واقفة بجد وبوقوفها بتحفز ناس تانية تيجي تقف معاها
.......................
انقسمت الآراء حول عملية حزب الله الأخيرة و توقيتها و أهدافها و مكاسبها و خسائرها ..شيء طبيعي مفيش موضوع بيتفق الكل عليه، ده غير إن في لبنان نفسها انقسمت الآراء و إن اتفق الأغلبية - و أولهم حزب الله- على تأجيل كل شيء لحين الانتهاء من الأزمة الحالية
غير الطبيعي كان نبرات التخوين التي يفضل البعض استخدامها لوصف الآخرين
فرق كبير بين انتقاد النظام و قطيع كتابه لعملية حزب الله و انتقاد أفراد أو كتاب -مش تبع النظام بأي معيار من المعايير- لنفس العملية. الفرق في الدوافع و أوراق اللعب
النظم - و بالذات في منطقتنا المنكوبة- لها حسابتها المختلفة المتعلقة بالبقاء في السلطة أطول فترة ممكنة و توريثها إن أمكن و حفظ هيبة زائفة لها و علاقات مع أمريكا بغض النظر عن ميزان القوى المائل في العلاقات دي، و بالتالي الانتقاد هنا ممكن جدا يكون تنصل من أي مسئولية إقليمية أو حتى إنسانية ناحية وقف العدوان الإسرائيلي غير المبرر - وفعلا- غير المتكافئ كرد فعل مع عملية حزب الله. تنصل من استخدام أي أوراق لعب ممكن تكون في يدهم
إنما انتقاد الأفراد انصب أساسا على فردية القرار وعدم حساب العواقب خاصة بعد ارتفاع حجم الدمار و عدد الشهداء و الضحايا بدرجة مؤلمة
و المحصلة فريق يتهم التاني بثقافة الهزيمة و الانسحاق و الفريق التاني يرد عليه إنه ثقافته ثقافة يأس...عايز يروح يموت هناك بدل ما يحارب هنا. و القضية -قضية اللي بيموتوا هناك كل يوم - ضاعت في النص
..............
شكرا لبنت مصرية على الافتراحات البناءة
مهم : تم فتح حساب تبرعات لصالح لبنان و يتم دفع التبرعات بنقابة الأطباء - دار الحكمة

6 Comments:

  • At 7/24/2006 7:05 PM, Anonymous Anonymous said…

    it's not that pessimistic

    show up girl ... missing you

    (f)

     
  • At 7/24/2006 7:34 PM, Blogger arabesque said…

    yawp

    well, I am trying to be positive but it is really disappointing.
    just getting a bit busy
    regards

     
  • At 7/28/2006 10:34 PM, Anonymous Anonymous said…

    انا اختلف معاكى فى حاجة مهمة اوى اوى اوى .........احنا بلا فخر مش صفر كبييييررررر اوى عالشمال.......احنا وللة الحمد اصغر صفر خلقة ربنا بس عالشمال برضة

     
  • At 7/28/2006 10:34 PM, Anonymous Anonymous said…

    انا اختلف معاكى فى حاجة مهمة اوى اوى اوى .........احنا بلا فخر مش صفر كبييييررررر اوى عالشمال.......احنا وللة الحمد اصغر صفر خلقة ربنا بس عالشمال برضة

     
  • At 8/02/2006 4:29 PM, Blogger ROMANTIC ROSE said…

    انا اتفق معاكي ف كل حرف كتبتيه يا مريم .. الامر بجد جلل و لا عزاء للعرب في أي شئ .. يا بنتي ده حتي الاستنكار و الشجب ما اتفقوش عليه ..

    و حاجه تانيه بقي .. باللهم عليهم يحلوا مجلس الامن ده علشان ملوش ادني لزوم .. علي الاقل يرحموا العيال من دراسته ف التاريخ و اهم يبقوا كسبوا ثوابهم ..

    ماهو يا يحلوا مجلس الامن يا يلغوا الفيتو .. ماشي ؟

     
  • At 4/26/2007 2:08 PM, Anonymous Anonymous said…

    Enjoyed a lot! » »

     

Post a Comment

<< Home