seeking freedom

"There is only one good definition of God: the freedom that allows other freedoms to exist." John Fowles

Tuesday, August 09, 2005

نشرة 6

من غير قصد و لا نية التليفزيون كان مفتوح على نشرة الساعة 6 و اضطريت أشوفها وبعد ما خلصت افتكرت كلمة بلال فضل في الدستور أن حال البلد مش هيتصلح طول ما النشرة دي موجودة ...عنده حق
طبعا سمعنا عن التوجيهات العليا أوي أن حملات الدعاية للمرشحين تدار بشفافية كاملة لأ وكمان ان صورة الريس ماتظهرش ورا الوزراء أو أي متحدث في التليفزيون....طبعا احنا عارفين ان الكلام دا هجص بس ماشي أدينا بنلعب مع الحكومة و بنعمل اننا بنصدق كلامها وبنندهش أوي ونصدم ونعيط لما نعرف انها بتضحك علينا
النشرة كلها كانت تقارير عن نشاط الوزارة الحالية . تقرير 1 : وزير الاسكان في موقع ميداني بيفتتح حاجة جديدة-ماهتمتش أعرف ايه- ولابس قميص و بنطلون عشان نعرف ان الحكومة دي بسيطة و شباب قوي و حاسة بينا ع الاخر
تاني خبر-قصدي تقرير-كان عن وزير البترول وانجازاته الهايلة مع اغفال طبعا مشاريع الغاز و اسرائيل و بيع ثروات مصر لسنين قدام
التقرير التالت عن وزارة التجارة الخارجية و ارتفاع صادرات مصر كام مليارو كله كلام و أرقام خد براحتك من غير أي دليل يخليك تصدق
ااه نسيت أقول ان النشرة بدأت طبعا بقراءة بيان وزارة الداخلية عن حادث اطلاق النار على المواطن اللي كان بيعلق ملصقات حزب الغد...وأكد البيان ان بلاش استهبال بقى يا ولاد ال... و اتلموا و مش كل حادثة تحصل تعتبروها مش فردية و مؤشر خطير و الكلام الكبير ده لأن الدعاوي دي من شأنها اثارة البلبلة
المهم انتهت النشرة انما أعلن التي في أن الفترة الاخبارية لسه ماخلصتش-مش هتقدر تغمض عينيك
الجزء التاني من الفترة الاخبارية المفروض انه مختلف جذريا عن الجزء الأول . كان فيه اتنين من المذيعين الشبان جابوا تقرير رابع-أي و اللهي-عن وزارة الصحة وقرارات زيادة رواتب الموظفين في القطاع الطبي
المذيعة أعلنت ان الخبر لاقى سعادة ورضا محصلوش من الأطباء و الكاميرا جايبة صورة كام دكتور بيصقفوا من غير أدنى اهتمام وهم بيسمعوا كلام واضح من التعبير على وجوههم معرفتهم المسبقة أنه كلام أونطة
وبعدين قرروا يجيبوا فقرة اسمها "كلام اليوم" أنا قلت دي أكيد بقى من الصحف و جايز يجيبوا كلام صحف معارضة ولا حاجة عشان يحققوا التوازن اللي قالوا عليه، لأ اتضح انها فقرة عن الأخبار الطريفة اللي من عينة ان الست في مصر عمرها أطول من الراجل و ان الكلام الصامت أو الحوار الصامت في البيت مسئولية المرأة و غيره من الكلام المتخلف اللي بيثبت أفكار غريبة و متخلفة عن المرأة وبيحملها كل المسئوليات اللي في الدنيا...............بس خلاص خلصت النشرة

6 Comments:

  • At 8/09/2005 6:24 PM, Blogger Taher said…

    ياريتنى ما فتحت التليفزيون قصدى النت فعلا الموضوع اتكتب بطريقة النشرة
    بس بصراحة الشفافية موجودة انا شفت اسم أيمن نور مكتوب فى بار الأخبار امبارح بس انا طبعا كنت بتفرج على حاجة غير الاخبار
    وهذا وان كان يدل يدل على شفافية السيد الوالى وحفاظه على رعيته
    والاطباء مرتبتهم زادت لىلىلىلىلىل دى زغروطة على ما اعتقد او صويت زادت كام يعنى
    الدكتور الى معاه الماجستير فى تخصصه بيقبض 250 او اكثر قليلا او قليلا
    وزيادة الماجستير 6.75 جنيه يعنى ما يكفوش عيش حاف
    ورايح سيادته شخصيا يفتتح محطة كهرباء فى الاميرية امبارح دا بمناسبة ايه انشاء الله ومن امتى.
    ياللا ربنا يعينه على الانفراستراكشر واهمها طبعا الصرف الصحى
    اللى اما انزل القرية عندنا الاقى حتة مبنى ما يكمل 300 متر مكلفله ييجى 5 مليون جنية وكاتبنهالى على يافطة بس حلو موضوع الصرف الصحى ده يتكتب عنه

     
  • At 8/10/2005 12:53 AM, Blogger arabesque said…

    اه فكرتني بحكاية بار الأخبار اللي أعلنوا فيه أسماء المرشحين اللي قبلتهم اللجنة
    طيب المفروض دول مواطنين متقدمين للترشيح انما اسم مبارك انكتب أول اسم و جنبه لقب الرئيس ، و بصراحة السؤال مش المفروض في الفترة ينزع اللقب ده؟ بس طبعا ماينفعش يحطوا اسم الريس لوحده كده و بعدين يحطوا "د." قدام اسم أيمن نور

    على فكرة كل الكلام اللي بكتبه اليومين دول مش معناه اني صدقت ان العملية المهلبية-الانتخابية- حقيقية ولا حاجة انما هي بس فرجة عشان نشوف ايه اللي هيحصل في الاخر، ومش قصدي بس اعلان اسم الريس كرئيس لفترة جديدة لأ اللي هيحصل بعد كده كمان

     
  • At 8/11/2005 3:10 AM, Blogger Mr-Biboooo said…

    النشرة حرام عليك نفسك
    ده التلفزيون المصرى

     
  • At 8/11/2005 11:03 AM, Blogger arabesque said…

    لأ المضحك فعلا ان لما جه أخويا قلت له اني قاعدة باتفرج ع النشرة عشان أعرف أخبار المواطن اللي اتصاب و هو بيعلق الملصقات
    فاخويا بص لي كده و سكت

    شوية و بصيت له أنا كمان و قلت له:ايه دا المفروض أدور ع الجزيرة مش في النشرة دي!!!!!!!!1
    فالولد يا عيني قال لي: أساسي طبعا ايه اللي جرالك؟؟؟


    دي لمحة بسيطة عن تأثير التليفزيون المصري و نشرة 6 :)

     
  • At 12/18/2005 1:36 PM, Anonymous 7 said…

    Devo complimentarmi con te arabesque per questo bellissimo blog! Veramente pieno di informazioni! Forse potrebbe interessarti dare un'occhiata al mio sito che contiene informazioni su scommesse ... se ti interessano scommesse è il sito che fa per te!

     
  • At 1/13/2006 4:34 AM, Anonymous 7 said…

    Cosa dire di più su نشرة 6 ? Credo che hai reso bene l'idea! Ti potrebbe interessare un sito su scommesse sportive ? Facci un salto e vedi se trovi qualcosa di interessante! Troverai solamente scommesse sportive .

     

Post a Comment

<< Home