seeking freedom

"There is only one good definition of God: the freedom that allows other freedoms to exist." John Fowles

Saturday, August 13, 2005

أقوى راجل فيكي يا مصر

ا"واذا كان الرئيس يعلم أن الشوارع دائما مزدحمة خاصة في ساعات الذهاب أو الخروج من العمل، ألا يتساءل كيف تم تسليك الطريق لسيادته؟ ألا يعلم أن المأمورين يلقون بسيارات المواطنين كيفما اتفق وفي أي مكان؟ ألا يعلم أن الشوارع غير نظيفة بطبيعتها لكنها تصبح مغسولة أثناء مرور موكبه؟ ألا يعلم أن كل هذا زيف و ضحك على الذقون؟" من مقال عذاب زيارة الرئيس لرفعت رشاد. المصري اليوم، الأربعاء 10أغسطس
هل فعلا يعلم الرئيس كل هذا؟ هل رئيس الجمهورية هو أقوى رجل في الدولة؟ لأ السؤال: هو مبارك فعلا أقوى رجل في مصر؟
السؤال ده بيلح علي من فترة، تقريبا من ساعة ما قريت مثلا مقال د.علاء الأسواني اللي اتخيل فيه لقاء بين مبارك و روح جمال عبدالناصر. المقال كان عبارة عن سرد لهذا اللقاء و كان محوره حث عبدالناصر لمبارك على اتخاذ خطوة جريئة يحقق بها تاريخ لنفسه و تكتب باسمه في التاريخ اللي مابيرحمش حد خاصة ان كل من عليها فان و الريس مش هيعيش أكتر مما عاش. وفعلا بدا مبارك على استعداد لاتخاذ مثل هذه الخطوة لحد ما اتدخل الأخ جمال مبارك و الست الوالدة عشان يؤكدوا أن بقاءه في مصلحة الشعب و الكلام ده...ا
بعدها بفترة قليلة مات الملك فهد و قعدت أسأل نفسي: ماهو حسني مبارك انسان برده و أكيد عارف أن الحقيقة الواحدة في الحياة دي اننا كلنا هنموت و نقابل رب كريم...لأ و كمان هو كبر في السن فعلا و كل "أصحابه" بيقعوا واحد ورا التاني وأكيد الدور جاي عليه
لما يكون الانسان في موقف زي ده بيفكر في ايه؟ لما يكون مسئول عن 70 مليون انسان أكتر من نصهم عايشين تحت خط الفقر و الباقي واكلها والعة، لما يكون فيه صوت معارضة جامد قوي من الداخل و بيكبر كل يوم و ناس بتشتم فيه و تدعي عليه في المظاهرات علنا، لما تكون الصحة في النازل و مش نافع شغل الصبغة و الضحك على الناس، لما تكون حتى محاولات التجميل و ابداء الاهتمام بالمواطنين-زي ماحصل كده في مؤتمر الاسماعيلية الأخير- بتعكس شيخوخة و كبر وتعب و عدم المام بالتفاصيل...في ظل كل ده الانسان السوي بيفكر في ايه...؟
انما أما يكون الواحد عايش في برج عاجي عالي أوي ، محطوط في مركز دايرة كبيرة قوي اطارها هو الشعب و بين المركز و الشعب عشرات الدواير اللي باصة على المركز و مدية ظهرها للشعب ، دواير كتير من الأفاقين و المنافقين و الحرامية و العارفين من أين تؤكل الكتف و الحرامية الكبار و الحرامية الصغيرين و اللي عايزين ينوبهم من الحب جانب...كل الدواير دي بتخلق عالم تاني خالص ، واقع مختلف فيه الحاكم اله منزه عن الهوى و بقاؤه تنازل و تكرم كبير منه للشعب اللي على هامش الدايرة لأوبيبقى كمان مظلوم عشان مضطر ما يكلش الأكل اللي احنا بنحبه لأنه لازم ياكل سوتيه -جايز لو الريس بياكل الأكل بتاعنا ما كانوش سمموه بالمبيدات المسرطنة
يبقى يفكر ليه في الحساب اللي بعد الموت ؟
هيفضل في الحالة الغريبة دي وعي و لاوعي شايف قدامه بس أعمى، لأن اللي حواليه قدروا يحكموا الشرنقة صح...وهو ماخرجش منها، جايز حتى ماحاولش كفاية انه المركز
هو البداية كانت ايه..اه..هل فعلا مبارك أقوى رجل في مصر؟

4 Comments:

  • At 8/13/2005 9:35 AM, Anonymous Anonymous said…

    http://www.shayfeen.com/Default.aspx

     
  • At 8/14/2005 8:40 AM, Blogger wa7d_masry said…

    مش عارف يا مريم اوصف لكي ازاي اما شرف الرئيس مدينة المنصورة وخلها مقفلة لسيادته من الصبح حتى بعد الظهر لدرجة حتى في ناس وصلت لغاية مدخل مدينة المنصورة ومعرفتش تروح شغلها وروحت تاني وناس فضلت محبوسه في البيت ممنوعة حتى من البص في البلكونة ساعة مرور موكب سيادته وحرموهم من الطلعة البهية واحد كبير بيحكي لي انه عد الشارع ليدخل الجامع علشان يصلي الضهر بعد محيله على الحرس بعد مارح وصلى معرفش يرجع اللي بعد مرور السيد حسني الحمد لله انه مش بيجي المنصورة اللي كل عشر سنين اهو يوم نستحمله الله يكون في عون جيرانه ولا يكمن يكون طفشوا منه

     
  • At 8/15/2005 10:29 AM, Blogger arabesque said…

    واحد مصري
    بمناسبة جيرانه حكى لي مصدر موثوق منه-مش عايزة أقول عليه عشان مايرحش ورا الشمس - أن الريس كل مايخرج لازم المنطقة اللي حوالين المقر كلها تتأمن عشان كده على طول كل عمارة يطلعها اتنين مجندين على الأقل يخبطوا على أى شقتين و يظهروا الكارنيهات عشان يقفوا في البلكونات يأمنوا العمارة
    لما شافني مستغربة قال لي "ما هم أكيد متعودين على كده"...!ا

    نفس السيناريو اللي حكيته حصل كمان
    في سوهاج في الزيارة الأخيرة، المحافظة اتحولت لسجن كبير في حالة انتظار

     
  • At 4/25/2007 8:41 PM, Anonymous Anonymous said…

    I have been looking for sites like this for a long time. Thank you! » »

     

Post a Comment

<< Home