seeking freedom

"There is only one good definition of God: the freedom that allows other freedoms to exist." John Fowles

Wednesday, January 04, 2006

خرّب..يخرِب..مخرّب من الداخل

من الطبيعي أن يتعاطف الإنسان مع أخيه الإنسان خاصة في مواجهة قوة غاشمة معروفة بغبائها وقسوتها وإذاقتها الأمرين للجميع. ولكن المصريين لم يشعروا بذلك التعاطف مع القتلى السودانيين كما أتضح من اتصالاتهم ببرنامج العاشرة مساءً يوم الثلاثاء. بالعكس رأى الكثيرين إن الحكومة صبرت كتير و عملت ما لا يعمل وإنهم يستاهلوا اللي جرالهم
أكيد جزء من رد الفعل كان بسبب غضب المصريين من سوء منظر الميدان و الرائحة السيئة و أيضا بلطجة بعض اللاجئين على المارة المصريين- حسب روايات المتصلين واللي بتنفيها مدونة تعذيب - وبالتالي بعض مشاعر الغضب و السخط قد يكون لها ما يبررها. لكن من ناحية تانية تعليقات الناس وعدم تعاطفها كان غريب و أظهر كم التخريب و الدمار الذي أحدثه النظام في الإنسان المصري
واحدة من المتصلين حقرت من شأن الاعتصام و قالت إنهم معتصمون لأن المفوضية خصمت مائة دولار من الإعانة فأصبحت ثلاثمائة دولار فقط. إيه يعني لما يأخذوا ثلاثمائة دولار فقط ؟ و شكت من البطالة و كل مشاكلنا بما معناه إننا مش ناقصينهم في البلد
حكى أحد المتصلين عن بلطجة أحد اللاجئين عليه وذهابه لقسم الشرطة، ولكن الضباط لم يتمكنوا من فعل شئ و قالوا له المشكلة دي حلها عند المفوضية. بعدها تحدث مصطفى بكري عن تهديد السودانيين لأمن المفوضية قائلا طيب الدولة سكتت لما المواطن اشتكى، هاتسكت قدام المفوضية كمان؟!!!!!!!! ا
متصل آخر رفض ما حدث، لكنه رأى أن الأمن تحلى بضبط النفس وإحنا عارفين لما الأمن عندنا بيضرب بيحصل إيه! بمعنى إنه كويس اللي جت لحد كده
المشكلة أنهم يعيدون إنتاج نفس الخطاب الذي يردده النظام مما يعبر عن نجاحه في ترسيخ الخطاب العقيم في عقول الناس. وبالتالي أصبح "الانبطاح" هو الأصل و أي محاولات أخرى لرفع الظلم أو حتى الاحتجاج بصوت عالي- تغيير المنكر باللسان مش اليد- خروج عن القاعدة و هو الوضع الشاذ في الشارع. إذن الأصل هو تجاهل الدولة للمواطن و اهتمامها بكل ما هو أجنبي-وأجنبي هنا لا تشمل السودانيين. و الأصل كذلك هو سياسة السحل و الإهانة. أما الاعتصام والاحتجاج فليس لها أي محل من الإعراب
المندوبة عن المفوضية أثارت نقطة أخرى لفتت نظرها من الاستماع لمداخلات المتصلين، وهي أن مصر كدولة التزمت بمعاهدة اللاجئين و قبلت بشروطها و بالتالي عليها و مواطنيها واجب نحو هؤلاء اللاجئين بمعنى أنه لا يصح أن نعتبرهم زيادة و عبء على الدولة. المندوبة قادمة من سويسرا وعلى دراية أن المصريين عندهم مشاكلهم أساسا، ولم تتحدث بلهجة هجوم. لكن ما لفت انتباهها مهم...إحنا ماعندناش مفاهيم مواطنة و حقوق إنسان أو مواطن أساسا عشان نفكر في اللاجئين
الأسوأ هو نبرة قاسم السمّاوي التي سادت في حديث البعض عن حصول السودانيين على إعانة و شغلهم لبعض الوظائف. كذلك الحديث و الإشارات المتكررة لممارستهم لكل طقوس حياتهم "بشكل طبيعي" تماما في الشارع مما يشكل خطرا على "أخلاق بناتنا وأولادنا" وهو أيضا ما نفته مدونة تعذيب. فعلا لا أستبعد أن يكون مصدر اعتراض المعترضين ليس الحرص على الأخلاق بقدر ما هو حقد و كبت لأن ولا حد منهم يقدر يتجوز أساسا-حتى في خيمة على طريقة كراكون في الشارع- في ظل الأزمة الاقتصادية وارتفاع تكاليف الزواج بسبب مفاهيم تانية استهلاكية و فاسدة
د.سحر الموجي كتبت يوم الاتنين في "المصري اليوم"عن ظاهرة الناس اللي فرحوا وبلوا شربات لما إبراهيم سليمان خرج من الوزارة وتساءلت عن صمتهم طوال السنين الماضية- بالذات أهل دائرته. لماذا لم يرفعوا صوتهم بالشكوى؟ الناس اختارت الحياة في هوان و الصبر و الصمت عليه. إنما كثرة الكبت بتقتل حاجات كتير جوا الناس...وبدل ما نواجه نفسنا و نحل مشاكلنا ننتظر أي جنازة عشان نشبع فيها لطم ونسقط كل مشاكلنا على ناس مالهاش ذنب

16 Comments:

  • At 1/05/2006 1:59 AM, Anonymous Alaa said…

    معاكي حق بس للأسف الموضوع أعمق من كده

    ممكن البني أدم ميتعاطفش معاهم كلاجئين خالص و يبقى عادي، رأيه كده، جهل، صعوبة حياتنا تخلي بعضنا يتصور أن الفرق مش كبير.

    لكن الموضوع لما يوصل لأنه الناس ما تتعاطفش معاهم بعد القمع و القتل الجماعي؟ متتأثرش بقتل الأطفال و تعتبر حياتهم و لا تهم أو تسوى؟

    الناس لما تعتبر أن الجنينة و الشارع و المنظر العام و الواجهة الحضارية أهم من البشر.

    ده يبقى اسمه ايه ده؟

     
  • At 1/05/2006 2:08 AM, Blogger KING TOOOT said…

    هما صحيح مش مصريين بس مافيش فرق
    نفس التعابين خارجة تزوم من نفس الشق
    و كأن الأنسان مالهوش فى حياته حقوق
    لا و الناس بتقول يستاهل ,, مالهوش حق
    و عـجـبـى
    KING TOOOT

     
  • At 1/06/2006 3:13 AM, Blogger arabesque said…

    alaa

    المشكلة إن في حاجات كتير جوانا ماتت ..من كتر الكبت و الظلم واحتراف السكوت بطلنا نبقى بني آدمين

    king tooot

    مفيش فرق فعلا نفس السياسة في التعامل معاهم ونفس الضرب
    ناصر أمين قال في البرنامج حقيقة من المضحكات المبكيات...قال عسكري الأمن ده لو دورت له وشه هيروح يضرب رؤسائه الناحية التانية، هو متبرمج هيخش يضرب

     
  • At 1/06/2006 3:53 PM, Blogger freedom said…

    عارفين كل ما أسمع عن مهزلة جديدة من مهازل النظام ، اقول فى عقل بالي
    النهاية قربت
    وأقعد استنى المهزلة الجديدة
    المشكلة ان كل الأطراف بيتصرفوا ويفكروا غلط
    يعني مثلا ، الجماعة السودانيين لو خدوا بعضهم كده وراحوا بلد بتحترم حقوق الانسان مش كان أكرم لهم
    واحنا لو حاولنا نحل المشكلة من الأول ف السودان بايجابية ما كانوش جم لينا أساسا ، والمفوضية اللى بتلطم دلوقتى
    كانوا فين ان شاء الله الفترة دي كلها
    ناقص حاجة مهمة لازم نفكر فيها
    هيا امريكا فين ودورها ايه ف اللي بيحصل ف مصر مؤخرا
    اكيد ليها ايد خفية

     
  • At 1/08/2006 10:34 PM, Blogger arabesque said…

    هل كل حاجة تحصل في مصر أمريكا يبقى لها فيها يد خفية؟
    مش عارفة ...بس مش شايفة حاجة في الحادثة دي غير غباء و همجية النظام. هما مش محتاجين ضوء أخضرمن أمريكا عشان يعملوا اللي عملوه

     
  • At 1/10/2006 1:03 AM, Anonymous adib said…

    your blog is very interesting!
    i'm very happy to discover it:)
    happy new year et aidek mabrouk!

     
  • At 1/10/2006 10:58 PM, Blogger محمد الطاهر said…

    أعتقد إن النظام مظلوم فى ذلك فهو لم يتجه لقتل الللاجئين إلا بعد ان أنهى على المصريين وبما أننا أخوه ومصر قلب العروبه يبقى ممكن نيجى شويه على إخوانا العرب
    حسبنا الله ونعم الوكيل

     
  • At 1/15/2006 6:17 PM, Blogger Taher said…

    يا جماعة احنا ماسكين فى سلبيات الحكومة ليه ؟
    احنا عارفين كلنا انه الكل فى النظام بتاعنا سمك لبن تمر هندى مع الاعتذار للسمك واللبن التمر فى التشبيه
    لكن هل اللاجئين صح 100% ولا عليهم بعض الاخطاء
    لازم اى حد يحلل الموضوع يكون عادل على الاتنين انتو فاهمين ازاى؟
    يعنى الامن بتاعنا وعارفينه من زمان وانا متاكد انه اخطأ حتى لو كان صح مش حتحصل انه يكون صح اعتقد
    لكن المنظر اللى حصل مش تمام
    عاوزوين تحليل دقيق

     
  • At 1/17/2006 5:22 AM, Blogger arabesque said…

    taher

    ناصر أمين قال في البرنامج- وكل الجرائد كمان قالت- حاجة مهمة هي إن عدد اللاجئين في البداية كان حوالي مائتين وبدأ في الزيادة. لو الحكومة اتصرفت من ساعتها أكيد كانت النتيجة هتختلف، أولا على الأقل ماكانش هيبقى فيه قتلى . ثانيا ماكانش الوضع هيتفاقم لدرجة إن المصريين -اللي اتصلوا في البرنامج- مايقدروش حتى يتعاطفوا مع الناس اللي ماتوا عشان نفسهم يعيشوا بشكل أفضل
    الحكومة سابت الموضوع يكبر و الناس تاكل في بعضها و بعدين دخلت طربقت الدنيا على اللاجئين
    بالنسبة لموضوع إنهم حولوا الشارع لحجرات نوم...الكلام ده أساسا صعب يتصدق و اتقال من مصادر حكومية يعني مشكوك في مصداقيتها، وبعدين مدونة تعذيب نفت الكلام ده . لما يبقى فيه وجهتين نظر كده أنا عن نفسي مش هاصدق وجهة النظر الحكومية

     
  • At 1/19/2006 12:45 AM, Blogger MASRY said…

    تعرفى
    أنا لم أسنطع أن أتمالك نفسى من البكاء عندما شاهدت ما حدث للأخوة السودانيين
    وبصرف النظر إذا ما كانوا لاجئين فعلا أم لا لأن دة ببساطة غير مهم على الإطلاق حينما تصل الأمور الى قتل 27 أدمى أغلبهم أطفال بكل هذة الفجاجة والدم البارد
    لكن ما أبكانى فى الواقع هو تذكرى أنة أثناء وجودى فى إحدى الدول الأوروبية فى مهمة عمل طويلة أن طرق على الباب شاب وفتاة وبعد أن قدما نفسيهما بدأ فى السؤال عن عدد أفراد أسرتى وعما اذا كانت ابنتى الطفلة تخضع لتأمبن صحى وإذا ما كانت إقامتى فى البلاد قانونية أم لا.
    وبعد أن أنتهت مهمتهم وأفهمتهم أن إبنتى تخضع لتأمين صحى وأن إقامتنا قاتونية إستوقفتهم متساءلا:
    وماذا لو كانت إقامتنا غير قانونية؟
    ردوا ببساطة:لا شىء , فقط كنا سوف نضع إبنتكم تحت نظام لللتامين والتطعيمات والعلاج المجانى.
    لا أدرى لماذا تذكرت على الفور حينها هذة القصة
    وشعرت بقدر عظيم من الخجل مما فعلناه بهؤلاء الأطفال
    الذين لم نكتفى بتركهم فى العراء بل قررنا أيضا فتح رشاشات من الماء البارد عليهم فى واحدة من أبرد ليالى القاهرة
    صدقينى إننا كلنا مذنبون
    ليس فقط الذين تهكموا عليهم بل وحتى الذين تعاطفوا معهم
    لأننا ببساطة لم نفعل أكثر من هذا التعاطف المريح

     
  • At 1/23/2006 9:13 AM, Blogger arabesque said…

    فعلا كلنا مذنبون
    أسوأ ما في الموضوع إننا مش بس متخلفين حضاريا، لأ متخلفين إنسانيا بشكل غير طبيعي و هو أقبح أنواع التخلف في الوقت اللي فاكرين نفسنا أكرم الشعوب أخلاقا و شهامة

     
  • At 1/24/2006 6:28 AM, Blogger joewilliams6667 said…

    This comment has been removed by a blog administrator.

     
  • At 7/22/2006 5:39 PM, Anonymous Anonymous said…

    Very best site. Keep working. Will return in the near future.
    »

     
  • At 12/28/2006 7:47 AM, Anonymous Anonymous said…

    Looking for information and found it at this great site...
    forex chart

     
  • At 3/06/2007 11:57 PM, Anonymous Anonymous said…

    Very nice site! » » »

     
  • At 3/15/2007 10:56 AM, Anonymous Anonymous said…

    This is very interesting site... film editing schools

     

Post a Comment

<< Home