seeking freedom

"There is only one good definition of God: the freedom that allows other freedoms to exist." John Fowles

Sunday, October 29, 2006

عن مهزلة وسط البلد

أول حاجة جت في بالي بعد الصدمة الأولى لما قريت عن موضوع التحرش الجماعي بالبنات في وسط البلد كان آخر مشهد في فيلم وحيد حامد وعادل إمام " النوم في العسل". الفيلم بيتخيل/يتنبأ حدوث حالة من العجز الجنسي في طول مصر المحروسة وعرضها، ومحاولات التكتم الشديد من جانب الحكومة للتعتيم على الموضوع وإنكاره باعتباره سبة في جبينها وفي حق كل المصريين (الرجال بالذات وبالتالي تهديد لأجهزة حيوية لأن تقريبا كل قيادات المجتمع والسياسة والشرطة رجال) - وطبعا ضربة في مقتل لسطوة المجتمع الذكوري. في النهاية بطل الفيلم وهو رتبة كبيرة في المباحث بيقود مظاهرة لمجلس الشعب وطبيعي بينضم لها عدد كبير جدا من كل فئات الشعب لأن المشكلة عامة وإنسانية جدا تمسهم كلهمو الهتاف كلمة واحدة "آه". المشهد ببساطة عبقري و مؤثر ومتنفذ حلو جدا و المشاهد بيبقى عارف كويس إن ال"آه" صرخة ألم من كتير جدا بيعاني منه إنما كانت المشكلة الجنسية هي القشة اللي قصمت ظهر البعير
افتكرت الفيلم وأنا بأقرأ التعليقات المبررة لما حدث على إنه رد فعل طبيعي للكبت الجنسي الذي يعاني منها الشباب المقصود (الذكور طبعا) وإزاي إنهم وصلوا لتلاتين وخمسة وتلاتين سنة من غير جواز...إلخ. الأسباب اللي فاتت تصلح فعلا كمحاولة لتفسير ماحدث أو فهم أسبابه أو تحليله ولكن ليس لتبريره على الإطلاق. مفيش أي تبرير لفعل الاعتداء على حرمة جسد شخص آخر، لأ واعتداء جماعي لا يمكن صده
مشكلات الاستثارة والكبت الجنسي و التعامل مع الجنس أساسا كتابوه في المجتمع المصري - ازدواجية التعامل يعني تتكلم عليه من تحت لتحت أو في الجلسات الخاصة أوكألفاظ وإيحاءات تتخلل اللغة العادية- كلها مشاكل موجودة من زمان وبيعاني منها الجنسين...كمان مشاكل ارتفاع تكاليف الزواج وعدم توفر مساكن بأسعار مناسبة ولا حتى فرص عمل، كل دي مشاكل مشتركة ولو أي حركة معارضة محترمة أو حزب معارض محترم عمل تعبئة وتوعية كويسة للشباب بحقهم على الحكومة في حل المشاكل دي ونظم اعتصامات - أقصد خروج أعداد كبيرة من الشباب للشوارع و الجلوس فيها بصمت بدون استفزاز-أكيد الاستجابة هتكون عالية و هتزيد مع تواصل الاعتصام وهتكون من الجنسين
لكن الشكل اللي حصل به التحرشات و نوعية البشر اللي الشهود وصفوها وفكرة تكرار ده بصورة أقل كل عيد تبين إن الموضوع أكبر من حكاية استثارة أو شباب مكبوت ممكن احتوائه أو توجيه طاقته ناحية سبب المشكلة الحقيقي
الشباب دول لو كانوا شاكين للحظة إنهم معرضين للعقاب ماكانوش عملوا كده، انتشار ثقافة البلطجة في الشارع و الفهلوة وغياب القانون ده غير طبعا شيطنة الآخر (البنات هنا) ومش هقول احترامنا لحريات بعض لأنه بقى رفاهية دلوقتي...الأول كنا بننتقد الازدواجية والتمسك بقشور الدين وإهمال الجوهرو الاهتمام بالمظهر العام قدام الناس و ممارسة كل الشرور في الخفاء، دلوقتي بنتكلم عن الانتهاك العلني وسط شعور بالعجزلأن أدوات الفعل الحقيقي في مشكلة زي دي مش في ايدينا، ولأن أي فعل أو إجراء شعبي لمواجهة اللي حصل - مقصدش هنا المظاهرات -مهدد دايما إنه يدخل في دايرة الإخلال بالأمن السياسي أو بمعنى أصح التعرض لاستهبال الأمن بدعوى تهديد الأمن السياسي أو الاجتماعي

9 Comments:

  • At 10/30/2006 6:47 AM, Blogger tamer afify said…

    عزيزتي
    أنا تابعت الموضوع في عدة مقالات وصور
    الحقيقة إن اللي حصل ده مش جديد
    ده بيحصل من زمان في الأعياد
    وخصوصا في الحدائق العامة مثل الفسطاط وغيرها
    بس رصد الموضوع على إنه سعار جنسي زي ما البعض سماه و الصورة فيها مئات الأشخاص شيء غير مقنع
    ومحتاج تحليل منطقي أكتر من كده
    يعني المتين شاب اللي في الصورة مش جياع ولا حاجه
    ولا عندهم سعار جنسي
    تعالي نلمس المشكلة الحقيقية
    المشكلة مش في الأمن
    ولا في الكبت الجنسي
    المشكلة ان الشباب افتقدو الوعي الأخلاقي
    والأسس التربوية الصحيحة
    في وقت اتربى جوانا إحساس بكل المتناقضات مع بعض
    الشباب مبقاش عندهم قضية
    لازم نخلقله قضية
    واللي معندوش قضية لازم يرتكب جريمة
    لأنه مش لاقي حاجة يعملها
    أنا أول مرة أقول رأيي في الموضوع ده ومعرفش قلته عندك ليه بالذات

    الشباب محتاجين تثقيف
    توعية
    تربية
    يعرفوا يحترمو الآخر


    طولت عليكي
    بس بحب أسمي الأشياء بمسمياتها
    أنا مش بتاع مقالات
    وزوري مدونتي تعرفي بنفسك


    ياريت نحط ايدينا في ايد بعض
    ونوصل رسالة وعي لكل شاب وشابة

    تحياتي

     
  • At 10/30/2006 12:42 PM, Blogger arabesque said…

    tamer afifi

    أنا فعلا معاك إن السبب مش بس كبت لأن-زي ما كتبت- ده موجود من زمان، ولأنه لو فعلا كبت يبقى ممكن ترشيد طاقة الغضب دي بشكل ما وتوجيهها ناحية المذنب الحقيقي بدل العدوان على طرف تاني مظلزم في المعادلة وبيعاني زي الولاد تمام
    إنما لما فكرت في موضوع "الترشيد" حسيت إنه مستحيل لأن شكل الجموع من وصف مالك وباقي الشهود يبين إنهم مجموعة بلطجية أو متربية على أخلاق الشارع..وإنت عارف شكل الشارع المصري بقى عامل إزاي
    أنا معاك إن انهيار الأخلاق وتسطيح الدين وغياب هدف أو معنى للحياة وكل ده من أسباب اللي حصل
    لكن فعلا أعتقد إن وجود الأمن كان هيفرق كتير..وجود رادع/ عقاب، خاصة مع غياب الرادع الأخلاقي زي ما انت قلت. إنما الأمن نفسه بيتحرش بالمتظاهرات في المظاهرات و البلطجة بقت ثقافة عامة وأحيانا ضرورة لاستعادة حق ما لأن القنوات الشرعية مسدودة أو متعبة لحد الإهانة
    التوعية والتربية مهمين أكيد، بس حقيقي مش عارفة إذا كان ممكن يتم في ظل النظام ده والمنظومة اللي عايشين فيها

     
  • At 10/30/2006 2:48 PM, Blogger TawTaw said…

    بشكل علمى ، التحرش والاغتصاب مش مرتبط بالكبت الجنسى بقدر ما هو محاولة لممارسة نوع من السلطة والعنف على الضحية بيمارسه عادة الأشخاص الأكثر فقرا وتهميشا فى المجتمع ، وفى تقديرى أن فيه علاقة بين القهر وامتهان الآدمية والكرامة والتهميش الاجتماعى اللى بيتمارسوا على هؤلاء المتحرشون سواء فى الأوتوبيس أو المصالح العامة أو أقسام الشرطة و بين محاولتهم خلع رداء الأدميه والكرامة عن المتحرش بهن، بشكل عام حسم أسباب الظاهرة فى مصر محتاج لبحث علمى متأنى.

     
  • At 10/31/2006 12:16 PM, Blogger arabesque said…

    tawtaw
    قريت الرابط اللي سبته عن التحرش وفعلا أعتقد إن جزء كبير من النوعية دي من الاعتداءات -في العموم- لها علاقة بالإحساس بالسيطرة وممارسة القوة على طرف تاني يشعر بالضعف قدامك ويستجدي الرحمة كمان

    فعلا الموضوع محتاج دراسة حقيقية لأن أسبابه متعددة وواضح إنها متغلغلة في الوعي واللاوعي بصورة ما ينفعش نمر مرور الكرام عليها...المشكلة إني شايفة إن أي دراسة مهمة فعلا لتوضيح الأسباب بس لكن الحلول الحقيقية اللي هتطلع بها هيستحيل تطبيقها- في رأيي- بصورة حقيقية في ظل النظام ده لأنها بتهدد كتير من دعائم وجوده و بتخلخل سلطته

     
  • At 10/31/2006 9:59 PM, Blogger Adham Khairy said…

    I hate to be pessimistic, but here is the thing...

    This is surely a consequence of our society losing grip of all moralities. And if you think about it, public molestation is only the tip of the iceberg and one of the extreme manifistations of this fact. Being a practicial person who's looking for solutions, here's my dilemma.

    HOW CAN YOU CHANGE THE MORAL OF A COMPLETE SOCIETY?

    I used to think that everybody, no matter how much evil he's done has a little bit of humanity inside of him that is waiting for the right motive to get him back on track, I used to beleive in the inherent goodness of a human being. But you know what? this incident made me think that maybe freud was right thinking that human are basically bad and its up to their society to supress this evil,

    Our society is becoming a non-moral one and is capable of holding no one, I hate to tell you that but, WELCOME TO THE FREUDAN HELL!!!

     
  • At 11/01/2006 11:51 PM, Blogger arabesque said…

    adham.khairy

    well.. despite everything, and not by means of big flowery expressions, I cannot just lose faith in human beings like that. For me it means that life, religion and everything are meaningless and really there become no reason for us to keep alive
    I am not blaming you or trying to take the "beautiful, innocent" viewpoint of life, on the contrary I mean it...there is no reason to live if ppl are such bastards
    As for the morality issue, ya u are right we are living in one of the worst ages ever and we really need to change a lot and work on a lot in this society and it would be a very long time b4 we create a good society to live in

     
  • At 11/04/2006 11:32 AM, Anonymous Anonymous said…

    السلام عليكم بصراحة الموضوع موضع دين اين القدوةاين الاخلاق اين الخوف من الله المخدرات والكلبيات وارتفاع الاسعار والبطالة وعدم التربية واين دور الاسرة المصرية المتدينة واين دور الحكومة وكل من هب ودب على الفضائيات يتكلم فى الدين والجنس فى وقت اصبح الشباب يقتد باسامة منير اين اخلاق المسلمين اين الرجال التى تخرج بنتهم بهذا الملابس الكسيات العاريات ماتت الرجولة لاحول ولا قوة الا بالله اتقوا الله يشباب ويبنات واتقوا يوما ترجعون فيه الى الله مسلم واتقو الله يحكومة لا اله الا الله محمد رسول الله وسوال اخير ايه هى معنى الحرية التعارى شرب المخدرات للشباب بدون عقاب التحرش الا تخافون الله وما اكثر منراء على الكورنيش من الجنسين اتقوا الله والسلام عليكم

     
  • At 11/04/2006 5:07 PM, Blogger arabesque said…

    أتفق معاك إن الدين جزء من الموضوع ...لكن أي تأويل وأي قراءة؟ بمعنى أن الظواهر "الدينية" الشكلية منتشرة جدا في المجتمع ومع ذلك الاعتداءات دي بتحصل
    كمان زي مافي فضائيات كليبات وعري فيه كمان فضائيات تتكلم باسم الدين والمحصلة النهائية صفر لأن كله مهتم بالشكل/ يعني من بره بس

    إنما كمان المشكلة سياسية وبدرجة كبيرة ...يعني ماينفعش نقول للحكومة اتقي الله ونتفرج
    الناس لازم تطالب بحقوقها وتصر عليها بشكل محترم وتبطل بقى "وأنا مالي" "يا عم أدينا عايشين" "ربنا يهدي" ونروح ننام بعد كده ونصحى على مصيبة أخلاقية
    نقطة تانية مختلفة معاك فيها
    موضوع الكاسيات العاريات...أيوة ممكن ترفض النوع ده من اللبس بس مش ممكن تحجر على حرية حد لأن هتلاقي اللي يحجر على حريتك كمان
    يعني اللي مش عجبه طريقة اللبس دي مايلبسهوش ويغض بصره إنما يتعامل بإنسانية وماينصبش نفسه حكم على البشر
    الحرامي لما يسرق ويقولك أصل مش معايا فلوس و الراجل ده باين عليه النعمة أوي، ماحدش بيعتبره بريء لأنه اعتدى على حاجة مش ملكه وبكده أذى إنسان و خالف أمر ربنا
    المتحرش اعتدى على إنسانة وأذاها وخالف أمر ربنا بالشكل ده ...يبقى القانون الأرضي لازم يطبق عليه -لأنه أذى إنسان بغير وجه حق وبالتالي هدد سلامة المجتمع وشجه آخرين على تقليده- أما حسابه مع ربنا فشيء لا نتدخل فيه ولا علم لنا به

    آه الحرية مش عري ومخدرات إنما مقدرش وماينفعش ومش ممكن وغير إنساني إني أبيد الناس اللي مختلفين معايا ورأيهم كده أو أؤذيهم عشان يخضعوا لرأيي بالعنف ولدفع الضرر

     
  • At 11/06/2006 8:18 AM, Anonymous Anonymous said…

    ظاهرة سلبية... مؤلمة للنفس ..
    و الحقيقةانها تحتاج لدراسة متأنية لفريق عمل يضم علماء علم النفس
    و الاجتماع و الدين و خبراءالامن و بعض ممن حضروا الاعتداء...

    لكن أيضا أحب أن اشيد بأصحاب المحلات الذين هبوا لنجدة الملهوفات...و أدعوا كل فرد في مجتمعنا ان يهب لاغاثة الملهوف.

    المرأة هي الام...و الاخت و الزوجة..و الابنه... و هذا ما يجب ان نعلمه لاطفالنا.. و نعلمهم احترام حرية الاخر طالما هذه الحرية لا تضر الفرد و لا المجتمع...
    سلوكيات ابنائنا لا بد من مراجعتها و تعزيز الصالح منها و تقويم الطالح.
    ربنا لا تؤخاذنا بما فعل السفهاء منا
    اللهم امنا في أوطاننا و كف ايدي الظالمين عنا
    اللهم أجعل هذا البلد سخاءً رخاءً.

     

Post a Comment

<< Home