لازم ناخد موقف

هذه دعوة لتلبية نداء جمعية أمهات مصر بارتداء السواد غدا حدادا على ما حدث في حق المتظاهرات، وغير المتظاهرات، أمام نقابة الصحفيين و ضريح سعد الأربعاء الماضي من اعتداءات سافرة من العسكر و البلطجية. لمزيد من التفاصيل زوروا مدونة
http://wa7damasrya.blogspot.com/

الرائحة تزكم الأنوف

من الان تنتابني جميع مشاعر الترقب و التحفز و الاشمئزاز من الضجة الاعلامية المنتظرة غدا و بعد غد من طراز "يوم تاريخي" و الشعب قال كلمته" و "نسبة التأييد غير مسبوقة " و انها "99% أو حتى 95%" سواء كانت عن حق، لأن معنى ذلك ان الشعب انضحك عليه وصدق التمثيلية واشترك فيها، أو كانت ضجة عن نتائج ملفقة و مزورة

"البيت مش بيتك ولا عمره هيبقى بيتك"

الحقيقة الدش بتاعنا بايظ بقاله ييجي تلات شهورو بالتالي أنا مستوايا انحدر لمشاهدة تليفزيون الحكومة بدل تشانل تو و الجزيرة .. المهم من يومين كنت بتفرج على برنامج البيت بيتكو كانوا مستضفين الكاتبة المحترمة فتحية العسال واتنين دكاترة جامعة واحدة منهم حزب وطني وكانوا هيتكلموا عن الاستفتاء على التعديل الجديد . ولأن فتحية العسال لها تجربة شعبية في اطار توعية المرأة بحقها في الانتخاب وعمل بطاقات انتخابية و شخصية كمان(لأن فيه لغاية دلوقت ستات في مصر ما عندهمش بطاقة شخصية) فالحديث اتجه ناحية قيمة المشاركة الايجابية في الاستفتاءو الانتخابات و أهمية صوت الفرد..طبعا ده كلام حق أريد به باطل..ليه؟ لأن اللي بيحصل دلوقت أثبت ان هو مسرحية بس مش حقيقة و لا حاجة ولأن اذا كان مبدأ تغيير الدستور مبدأ لا خلاف عليه ومطلب قومي قديم أوي فالصيغة اللي أجيزت في مجلس الشعب للتعديل الدستوري، بأغلبيته اللي هي حزب وطني ديمقراطي، فرغته من معناه و فرضت قيود رهيبة على أى حد محترم يفكر يرشح نفسه. و الوضع دلوقت انهم بيشجعوا الناس تروح تستفتي عشان تقول نعم للتعديل وبكده تديهم شرعية أمام العالم كله لأننا هنبان موافقين و مباركين العضمة اللي اترمت لنا بعد طول جوع للحرية و الدمقراطية. طبعا الحمد لله في ناس كتير فاهمة لكن المشكلة في الناس اللي مضحوك عليهم باعلام الحكومة و في الناس اللي فاهمين ان مشاركتهم دي ايجابية و عدم مشاركتهم سلبية و ناسيين ان مقاطعة الاستفتاء عن وعى و فهم و ليس بمبدأ" كبر تعيش" دا فعل سياسي و مقاومة سلبية لأن مفيش مجال لمقاومة ايجابية هنا لأن مفيش خانة في البطاقة تستفتينا كمان على نص التعديل الدستوري.و اللي انا بقصده هنا حصل في نهاية البرنامج لما كان مفيش و قت للردحيث قام المذيع الفلتة الجهبذ تامر أمين بابداء رأيه في مقاطعة المعارضة للاستفتاء قائلا لفتحية العسال ان دي سلبية و ان مينفعش ان المعارضة تقاطع الاستفتاء لان"متهيأ لها" ان هيحصل تزوير أو تلاعب و أن المفروض تخوض التجربة الاول و بعدين تبقى تتكلم. طبعا الأخ المفروض ان هو مذيع بس.. مش متحدث سياسي باسم السلطة و احنا مش قاعدين عشان نسمع أراء سيادته و المفروض انه لو قال كلام زي دا يقوله بس عشان الضيف اللي قدامه يعلق أو يعقب ..دا أ ب اعلام و صحافة لكن الاخ تجاهل دا كله و قفل البرنامج على كلامه عشان دي الرسالة اللي توصل للي قاعد مش فاهم أو للشباب المغيب وهي دى وظيفة الاعلام في الفترة الجاية. وأنا مش عارفة هل نعمل يعني ورقة باسم شباب مصر نوقع عليها عشان الناس تفهم مبررات مقاطعتنا للاستفتاء و لا ايه...على فكرة انا طوا البنامج و انا كنت بحاول اتصل بس مفيش فايدة طبعا تليفونهم مشغول..

قصيدة لتميم البرغوثي

تميم البرغوثى.. نبت مصرى من ..جذر فلسطينى.
.الام رضوى عاشورو الاب مريد البرغوثى..لذلك الولد
طالع عفريت ..و هو هنا يدخلنا معه " معمودية النار"
لعلنا نتطهر!!

فى العالم العربى ، تعيش،
كما قط ساكن تحت عربية
عينيه ، ما تشوفش م الدنيا دى حاجه إلا الجزم..
فى العالم العربى ، تعيش،
كما بهلوان السيرك..
تحتك بهلوان، دايس عليه،
و فوق دماغك بهلوان دايس عليك!
و الكل واقف ..محترم!

فى العالم العربى ، تعيش،
مبارة ، بقالها الف عام
لعيبة تجرى يمين و شمال
و الكورة طول الوقت
فى إيدين الحكم!
فى العالم العربى تقول للبنت حبيتك!
تناولك بالالم!!

فى العالم العربى تعيش،
تشتم فى طعم الميه و الطعمية..
و القهوة ، و روادها، و فى مراتك و أولادها..
فى االلى بيعمله إبليس
و فى التفليس
و لو سألوك..
تقول ،: الحمد لله ربنا يديمها نعم..

فى العالم العربى تعيش،
كما دمعة فى عيون الكريم
المحنة تطردها يرجعها الكرم..
فى العالم العربى تعيش
تلميذ فى حوش المدرسة ..
من غير فطار!
عينه على الشارع و بيحيى العلم

فى العالم العربى تعيش،
بتبص فى الساعة
و خايف نشرة الاخبار تفوت
علشان تشوف ع الشاشة ناس
فى العالم العربى ،
تموت،،
تميم البرغوثى